› 選擇地區
三藩市
紐約
洛杉磯
其他美國地區
香港 台灣 北美
 
2012年05月07日

隔牆有耳:黃大仙剩男剩女集中營 - 李八方

正所謂區區有睇頭,18區最富有係中西區,最窮係深水埗,呢啲唔使講都知,但近日潮流興講「剩女」,邊區最多剩女你又知唔知?唔好以為女強人聚居嘅灣仔、中西區係「剩女」集中地,官方數據話你知,18區中,黃大仙先至係「剩男剩女」集中營!
統計處早兩星期公佈咗2011年人口普查嘅分區數據,除咗了解邊區最多房奴,供樓供到氣咳;邊區最多打工皇帝之外,仲有一個被視為終身幸福數據,就係每區15歲以上從未結婚嘅人口比例。

荃灣姻緣最旺

八方真係勢估唔到,黃大仙竟然係各區中,未婚比率最高嘅區域,剩男比例高達36.2%、剩女嘅比例有31.6%,未婚男女各自高達逾6萬人,雖然統計處條線劃喺15歲,但按比例推算,即使到咗適婚年齡,剩女剩男嘅比例都係會一樣咁高。唔通年年都咁多來自18區嘅善信去黃大仙求籤,畀佢哋求走晒黃大仙區嘅姻緣籤,搞到呢區自身姻緣運咁麻麻?
剩女高企區份排第二係中西區,其餘係南區同大埔。咁邊區最少男女未結婚呢?答案原來係荃灣,無論男同埋女,未結婚嘅比例都係最低,男係30.3%,女係27.6%。咁如果想搵老婆老公,擺脫單身,應該搬去黃大仙碰運氣,定係殺入荃灣好呢?
黃大仙「票王」區議員胡志偉喺該區紮根咁多年,都話無從估計點解自己呢區咁多剩男剩女,推斷原因之一係因為黃大仙呢區係舊區,好多長者後生時,都係擺幾圍、拜過天地就叫做結咗婚,所以冇官方結婚紀錄喎。不過全香港有咁多舊區,八方認為呢個講法未必成立。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載