蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年04月26日
馬上成為壹會員

隔牆有耳:港大真人版《溏心風暴》 - 李八方

港大學生會內務副會長張楚晞(中)大喝一聲「我雙眼就係證據」,再鬧爆同學仔係政黨走狗,有霸氣!
互聯網

上集:「我雙眼就係證據」

為咗推翻番香港大學個紅色學生會,400幾位同學仔上星期六簽晒名,啟動公投踢走會長陳冠康、評議會主席譚振聲。點知,前晚就上演咗場港大版《溏心風暴》。
話說喺當晚9點半,評議會搞咗場緊急會議傾點樣做公投罷免學生會。評議會專登揀咗最狹窄嘅學生會房仔開會,好多同學入唔到,學生會屬下嘅社會科學學會外務副主席池嘉怡要求去間大少少嘅房。但學生會會長陳冠康唔出聲,池嘉怡話:「我唔該你呀,我哋真係冇希望啦!」
點知有紅色背景嘅內務副會長張楚晞突然暴跳如雷話:「池嘉怡議員你唔好強姦民意啦……你根本已經俾政黨滲透。」跟住張楚晞又話池嘉怡同社民連friend底,係「政黨走狗」,仲45度角chok住話:「我頭先睇到,我雙眼就係證據。」搞到11點休會。

下集:振聲哥報稱被摑鬆人

到咗噚日凌晨,50幾個同學群情洶湧,評議會終於去咗莊月明文娛中心大房復會。忽然,譚振聲話社民連成員、港大老鬼徐傑生摑咗佢一巴,仲將眼鏡摑甩,然後就打電話報警兼call白車,急救。
今次譚振聲就有更好嘅藉口,再拖延個罷免公投機制啦!譚振聲好㷫,喺會場外面同五個同學仔商量。同學仔就話:「你家走都唔係辦法㗎,我覺得入去再處理,入面個個都係大學生,個個都係理智嘅!」譚振聲:「我畀人打喎家!點入返去?」後來有架白車到咗,譚振聲上咗白車急救。

大結局:揭上白車篤iPhone

清晨時分,有兩個同學仔見到譚振聲上咗白車,於是靜靜雞舉機拍嘢,點知俾佢地拍到啲好嘢喎。原來譚振聲同前出版秘書林璟毅上咗白車,但唔係療傷,係玩iPhone,兩個人篤篤下,唔覺有人受傷囉。有同學見到就話:「浪費警力,濫用救護車服務。港大笑話。」

老鬼「影評」:學生會無賴

對於呢次港大《溏心風暴》,學生會老鬼有話兒,狠批譚振聲、陳冠康「黐線、無賴」。
電台節目主持人、港大計算機科學學系「老鬼」潘小濤,以前都好活躍參加國事學會同《學苑》,對評議會譚振聲嘅表現覺得好失望。佢話之前點算聯署人名時候,譚振聲已經用「冇鎖匙」做藉口,經已係「黐線」,而家仲用千方百計拖延「罷免公投」,「點可以為咗自己嘅利益,不惜一切破壞規矩?」
傳媒人、港大94年學生會長莫佩嫺就話:「學生會係有章程、憲法,點可以唔跟呢?你唔跟即係無賴啦!我唔明白點解啟動公投係咁難囉,夠數就可以啟動啦!」

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載