蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年04月10日

沙膽虹手記:壹傳媒難以取代 - 沙膽虹

市場傳聞,肥佬黎要將台灣的壹電視、《蘋果》和《壹週刊》全賣掉,消息在台灣傳得沸沸揚揚,甚至有埋價錢,話五億美金,即約三十八億港紙。沙膽虹聽見,第一個反應係:咁便宜?單是一份台《蘋》都唔止值呢個數啦!即使壹電視蝕大本,而肥佬黎又想返香港打仗,大不了咪處理咗壹電視,剩番台《蘋》台《壹》袋袋平安亦可以。五億美金就想肥佬黎放棄二千三百萬華人的台灣市場?太便宜了吧!
不過,沙膽虹今日並非想分析呢個傳聞交易,而是留意到喺傳聞鋪天蓋地傳出後,有人喺facebook發起咗一個搶救壹傳媒網站,呼籲所有華人加入,別讓壹傳媒倒下,認真可愛。如果沙膽虹係台灣人,都唔想壹傳媒易手啦!沙膽虹十一年前有份督師參與創辦台《壹》,深明壹傳媒在台灣天不怕地不怕為民眾抱打不平主持公道,是難以取代的。猶記得有一個金控集團曾提出以五千萬台幣廣告和專訪,換取台《壹》抽起一篇封面故事,我們斷然拒絕;○三年沙士,和平醫院大爆發,台《壹》記者冒險留在院內採訪,揭露真相,當知道院內護士連保護衣和口罩都唔夠,更馬上義贈……
肥佬黎講過,壹傳媒去咗台灣之後,台灣就好似開咗燈,蛇蟲鼠蟻甚麼都睇得清清楚楚。若然壹傳媒真的要撤出台灣,燈豈非又要關掉?難怪有人要發起搶救壹傳媒!
沙膽虹

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載