› 選擇地區
三藩市
紐約
洛杉磯
其他美國地區
香港 台灣 北美
 
2012年03月05日

隔牆有耳:「記者區」警察多過記者 - 李八方

呢個叫做記者區,但企入去嗰幾位,斷估唔係記者。事實證明,警察設記者區限制採訪根本係多餘。

每次有遊行示威,警察都好鍾意「協助」記者採訪。佢哋最拿手嘅動作,就係喺四方八面擺好鐵馬,「幫」傳媒設立指定「記者區」。就好似示威熱點中聯辦咁,門前嘅花槽係最有利嘅拍攝位置,但警察就經常霸嚟做「警察行動區」,硬係要記者喺側面車閘外嘅「採訪區」離遠打斜影示威相,極之妨礙採訪。

前日民陣「踢走爛攤子,還我真普選」大遊行,警察先生又喺新政總對出嘅天橋上,放咗鐵馬set記者區。只不過係呢個記者區入面,唔見有傳媒舉機影相,只見有六、七位着住警察制服嘅「黑影」進駐,齊齊實示威者衝入新政總嘅情況,仲不斷用手機即時向上頭報料。其實喺採訪現場,邊度有事發生,記者就會走去邊,根本冇需要設立記者區限制採訪,怪唔得當日有遊行人士要攞走啲鐵馬洩憤。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載