› 選擇地區
三藩市
紐約
洛杉磯
其他美國地區
香港 台灣 北美
 
2012年03月05日

隔牆有耳:「膽大心細」攞着數CheapExecutive - 李八方

辣㷫公務員嘅特首曾蔭權,除咗外訪時唔避嫌接受航空公司提升客位級數之外,有公務員仲踢爆,佢出差入住豪華酒店時,最鍾意用自己信用卡碌卡結賬,然後由公帑退數,佢就可從中賺取大量信用卡積分。咁做雖然冇犯規,但竟然咁厚臉皮唔放過任何可以攞小便宜嘅機會,堂堂ChiefExecutive變咗CheapExecutive,真係好肉酸囉!

相關新聞:隔牆有耳--《才女彈》白姐姐:轟下台

公幹碌卡賺取積分

有高官向八方爆料,煲呔貪小利嘅作風,官場早已街知巷聞。佢由做高官到做特首,外訪時入住酒店,即使同行官員都由政府部門一併找數,但佢總係要用個人信用卡碌卡,因為可從中賺取信用卡積分優惠。佢每年外訪不下十數次,入住酒店又豪,尾收工前呢幾個月又四圍飛,信用卡「刮」落唔少積分啦。
公務員外訪用公帑買機票,若有飛行哩程優惠,一定要交晒出嚟,否則要紀律處分。按正常程序,當累積飛行哩數足夠可升級時,官員要等到另一次飛長途,符合政府規定可坐商務客位時,先至買一張經濟位機票,再用飛行哩數升級為商務客位。都係嗰句啦,咁點解特首又可以待人以嚴,律己以寬呢?
官場老友話,煲呔經常接受航空公司升級優待,雖然都唔違規,但一定有利益衝突。因為特首多數會坐屬本地的國泰或港龍航空班機,而國泰同港龍都由港府批出航權,特首點解唔使避嫌?

何宣威拒國泰優惠

官場好多人都聽過一個真正廉潔嘅例子,就係喺舊年退休前休假嘅運輸及房屋局秘書長何宣威。佢坐國泰機去加拿大度假,國泰為佢升級至商務客位,何宣威即拒絕,因為佢之前係制訂航空政策嘅高官,唔可以接受國泰款待或者優惠。佢仲即刻打電話畀國泰高層話:「你想害死我咩!」

mailto:pf_lee@appledaily.com

相關新聞:隔牆有耳--《港姐撐》李珊珊:放佢一馬

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載