蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年02月25日

隔牆有耳:狼豬板塊 - 李八方

設計圖片

小圈子選舉嘅豬狼之爭,係一場唔同利益集團嘅角力。套用練乙錚較早前所講嘅「板塊理論」,兩塊蠢豬、野狼嘅板塊上面,都係唔同嘅財團同阿爺嘅人。兩房明爭暗鬥想上位。八方今日就同大家睇真啲,豬狼板塊嘅勢力分佈。

梁營 提名票292

以為「齊心」兩粒字可以遮住個「共產黨徽」,一張提名名單即時令狼英現形。名單嘅四分一提名,唔係民建聯,就係工聯會,仲有漁農界50多票「傾囊相授」,足足成為「野狼板塊」嘅一半力量,測量建築界、中資企業同恒隆等小地產商,都唔想地產巨頭玩晒香港,於是咪企埋狼振英嗰邊,博佢可為大家搶回地盤。

─地產商系─
陳啟宗(恒隆)、郭炳湘(新地)、陳修杰(新世界)
羅康瑞(瑞安)

─土共系─
鍾瑞明(民建聯)、楊耀忠(民建聯)、鍾樹根(民建聯)
陳少棠(民建聯)、陳偉明(民建聯)

─專業系─
鄔滿海(前屋宇署署長)、陳茂波(會計界議員)、盛慕嫻(會計界)
蒲祿祺(測量師)、潘永祥(高級講師)

─中資系─
閻峰(國泰君安)、高彥明(河北首富)、謝湧海(中銀)

中電副主席阮蘇少湄

商界幾乎全數挺唐,「蘇眉」唔通唔妥某人「賣妻求榮」,所以寧願唔提名?定係睇定啲,留後路?

合和董事總經理胡文新

阿爸胡應湘提名畀唐唐,「富二仔」胡文新本來有傳挺梁,但最終冇咗影,變咗地下凉粉。

嘉華呂慧瑜

爸爸呂志和撐唐,但個女都hold住唔提名,係咪擔心局勢有變,影響既得利益?

唐營 提名票378

係豬欄板塊上,所有大型地產商都係度插旗,仲有一班擅長保皇嘅工商界、飲食界、零售界嘅「老闆力量」,證明大商界大老闆們有幾憎隻狼。
即使唐唐應承搞標準工時冧盡工聯會,但工聯會照樣一票都唔放畀唐唐,可見傳統土共力量,幾唔like代表大資本家嘅唐唐。

─地產商系─
李嘉誠(長實)、李澤鉅(長實)、郭炳江(新地)
郭炳聯(新地)、李兆基(恆基)、李家傑(恆基)

─土共系─
鄭家純(新世界地產兼民建聯)、盧文端(民建聯)、吳仕福(民建聯)
曹王敏賢(民建聯)、黃碧嬌(民建聯)

─商界系─
胡定旭(總商會)、田北俊(總商會)、林健鋒(總商會)
袁耀清(總商會)、楊國琦(總商會)、黃宜弘(中華總商會)

─工業系─
林大輝(唐英年家臣、廠商會)、梁君彥
(新興織造廠經營者)、孫啟烈(建業五金塑料廠董事長)

恒生副董事長梁高美懿

同屬滙豐嘅王冬勝投左畀唐唐,但係滙豐系嘅恒生銀行梁高美懿就選擇唔提名,係咪分散投資,當買個保險,以免將來冇運行?

歌星譚詠麟

本來以為校長西瓜靠大邊,但係頂佢唔順咁「弱智」,即時收番再決定。八方好記得,校長當年挺董㗎!

民建聯譚耀宗

大大聲話唔會提名,明顯擔心押錯注未來五年冇運行,又要準備隨時獻身畀太空成,所以都係唔郁住,寧願聽阿爺吹雞好過。

兩塊板塊敵我分明,有人「睇定啲先」以免冇運行。所以欣賞完呢兩塊板塊後,如果有人仲高喊呢場選舉係比理念、比政綱、比能力,咁就真係「好儍、好天真」。呢場只係權力鬥爭嘅假選舉,值得留意嘅係,兩大板塊背後,同時進行緊嘅係大陸太子黨與團派更加殘酷嘅「權力鬥爭」,豬狼誰勝誰負,要等咁多位「阿爺」係大陸鬥完先有分曉。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載