蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年02月06日

隔牆有耳:鷹之子伸鷹爪 搞公大學生會 - 李八方

一哥曾偉雄同阿仔曾憲民成個餅印咁;曾憲民喺公大學生會選舉中,仲顯露晒鷹派作風㖭。

鷹父無鴿子。警隊鷹派一哥曾偉雄以傲慢鐵腕、打壓示威見稱。鷹之仔曾憲民都唔係省油燈。佢喺公開大學讀緊finalyear,係學生會評議會主席,最近捲入內鬥。有現莊幹事指摘鷹之子行政干預學生會選舉,老屈泛民派內閣偷步宣傳,掀起打壓民主選舉風波。

話問過私人律師

現屆學生會外務副會長湯子霈(Leroy)話,學生會一向分成建制派同泛民派。評議會係建制派陣營。家正值學生會選舉,建制同派民各自扶植一個內閣參選,仲有一個疑似隱形左派內閣「票」。鷹之子搵咗一班建制友好組成選委會,最近同泛民內閣Puzzle開拖。
據講候選內閣慣常喺提名期完結後開始宣傳,會章冇寫明幾時先係宣傳期。選委會聲稱收到同學投訴,話學校未提供宣傳攤位就派傳單係「偷步宣傳」,罰佢哋停止宣傳兩星期。Leroy批評選委會無厘頭,事前從來冇講過有咁嘅規則,「曾憲民事發之前喺facebook留言,話我哋可能冇去一月尾個會,所以唔知宣傳規矩。我哋有錄音證明個會根本冇提過宣傳期問題」。
曾憲民回應話,Puzzle喺未被確認成為候選內閣前,就用咗「公開大學」等字眼做宣傳,佢問過自己私人律師,咁做係違反《公開大學條例》,果然係重視法治呀!現屆泛民派密謀反擊,準備召開緊急會員大會向選委會提譴責動議,Puzzle已經印咗一批「選舉不公」嘅T恤長期抗爭。

稱一定唔會考警察

到底鷹之子曾憲民有幾「鷹」?Leroy話,有次佢組織學生去六四燭光集會,鷹之子竟然話「都過咗咁耐啦,冇乜人記得㗎喇」。集會之後公大同學跟大隊遊行去北角,警察突然收窄遊行路線釀衝突。事後鷹之子竟然話番班同學轉頭:「你哋搞到我塞咗幾個鐘頭車呀!」

據聞將赴德升學

不過佢一向對老竇身份好低調,上年老竇升做一哥,佢只係講畀幾個老死聽,點知最後都係傳到全校都知。「據聞佢讀埋今年就去德國升學,個個同學都估佢一定返嚟做AO,到時香港人就慘。」
八方問過曾憲民係咪真係批評過同學六四晚遊行?佢話咁耐嘅事唔記得咗,佢家讀緊英文語言及教育系。今年23歲嘅佢話自己未有正職,同學仔爆料佢有做兼職婚紗攝影師。被問會唔會考警察,曾憲民就話佢一定唔會。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載