蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年01月18日

隔牆有耳:政黨擺年宵 公民黨贏晒 - 李八方

每年年宵市場都係各大政黨開檔賣嘢、用以幫補開支同宣傳嘅黃金檔期,一如以往,各黨少不免賣吓嘢諷刺時弊。公民黨最突出,暖手枕寫上「終止功能組別」同「反地產霸權」,另外仲有海報,一套四款包括「瑞麟獻世」、「李家之城」、「京官賜封」、「財爺到」,有林公公、首富做門神,配埋對聯「唔派唔知錢銀多,唔做唔知民怨勁」、「我們要投龍虎鬥,無奈只看豬狼爭」,食正近期熱門議題條水,贏晒。同場加映余若薇親筆字畫,啱晒一班粉絲。

華叔揮春仍然有貨

支聯會今年冇咗華叔,寫揮春改由張文光擔大旗,難得支持者唔介意,一樣咁期待。始終都係對華叔揮春有情意結?唔怕!華叔揮春仍然有貨,捐番20蚊,照舊拎到心頭好返屋企。支聯會繼續行維權路線,推出新版民主女神像同手機清潔貼,提醒港人毋忘六四,仲有印上劉曉波、艾未未嘜頭嘅T恤,爭取釋放內地維權人士。
社民連推出500套「社運康樂棋」,行正「發水樓」、「李氏力場」嗰格,隻棋立即要行返轉頭,寓意香港人遇到地產霸權一定冇運行。另外又有「豬狼搖鼓」,梁振英着住內地解放軍服,唐英年飲紅酒,毫不留情捉兩位特首參選人痛腳。30蚊六個襟章,印住「仆佳」、「反23條」、「反功能組別」等,想隨時隨地發洩吓亦得。
相對於支聯會同社民連,新民黨年宵攤檔只賣卡通龍公仔,噱頭差少少,好彩有香港人網幫吓手,趁機送咗套「特首魚蝦蟹」畀葉劉,算做搶番啲焦點。
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載