› 選擇地區
三藩市
紐約
洛杉磯
其他美國地區
香港 台灣 北美
 
2012年01月09日

沙膽虹手記:香港人,學吓啦! - 沙膽虹

香港德輔道中喺全世界三十大購物大道中排尾二,廣東道DOLCE&GABBANA又粗暴禁止香港人拍照,再加上無日無之嘅食物有曱甴送兼死不認錯,香港的購物天堂美食天堂美譽,唔使賴蝗蟲累港,自己都快敗得乾乾淨淨!
反而,一位在澳洲開中餐館的老細,講咗個喺澳門嘅親身經歷畀沙膽虹聽,更令人擔心香港人服務態度遲早連澳門都不如。
這位仁兄趁聖誕新年回港探親,順便去澳門飲飲食食,佢住銀河酒店,貪就腳同班朋友去樓下嘅葡國菜餐廳食晚飯。當日佢有些水土不服,下午仲屙咗幾次,本來都想食少啲,但見馬介休球、沙甸魚和豬肋骨好正,都忍唔住食幾塊。主菜食完,佢覺得有點唔舒服,起身去廁所,點知未行到出門口就頭暈,之後仲眼前一黑,好彩有朋友同佢一齊去,馬上扶住佢而不致跌倒。
坐了一會,佢雖然恢復神志,但仲係面青口唇白,而且有啲暈暈哋;由於佢十幾年前中過風,為穩陣計都係call白車去對面鏡湖醫療中心檢查一下。當天在葡國餐廳的銀河餐飲經理蒙狄龍真係唔話得,不單全程照料,仲親自送佢幾個朋友行過去醫療中心,並囑咐要畀個電話佢令佢安心。
佢經過一輪診斷,吊埋鹽水,再做埋腦掃描,可幸乜事都冇,相信是屙了幾次令身體虛弱,可以出院返酒店休息。翌日朋友講番畀佢聽,佢先知自己遇到這位大好人,退房後親往道謝。
香港人,學吓人哋用個心去關懷客人嘅服務精神吧!

沙膽虹

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載