› 選擇地區
三藩市
紐約
洛杉磯
其他美國地區
香港 台灣 北美
 
2012年01月09日

隔牆有耳:泛民版豬狼對決 - 李八方

八方有位少女同事成日話,何俊仁同馮檢基佢兩個一綠一黃,似足IQ博士入面嘅宇宙大王同佢手下。但睇真啲呢對泛民活寶貝近月鬥來鬥去,都幾似一場另類「豬狼之爭」。佢哋邊隻係狼、邊隻係豬?民望落後嘅馮檢基,顯然係泛民版嘅「灰太狼」啦。何俊仁外形咁可愛,同麥兜都有幾分相似㗎。

馮檢基逢請必到

阿基同狼振英最似嘅地方,就係識得「打基層牌」去惡補知名度同認受性不足。論知名度,阿基一旦跳出老巢深水埗,真係唔算多人識,相反鐵頭仁貴為民主黨主席,名氣響噹噹,同時不時因為失言而成為焦點人物嘅唐唐一樣咁多人識。
但阿基唔怕冇人識,只要有人請,大小騷無任歡迎,同狼振英一樣逢請必到、逢到必早、逢早必見報。振英哥扮路人甲踩入民建聯黨慶活動;阿基就學黃夏蕙去名牌惡霸D&G地舖嚟多次「完美挑機」,兩位嘅拉票模式,都令唔少政界中人嘆為觀止。
相反仁哥出席嘅活動似乎比阿基少,呢一點就同唐唐hea住參與好相似,畀人懶豬感覺,至今都冇乜拉票新猷。唐唐豬係名門望族,何俊仁都唔輸蝕,阿爺巴閉過賭王,當年係大地主,足足有成六房19個仔女,背景一樣好雄厚。

仁哥作風似唐唐

講到政綱,噚日CY被問到會否回購領匯時,提出喺領匯商場附近起多啲商場,引入競爭。呢條「橋」熟口熟面,查實係馮檢基喺泛民初選論壇率先提出,CY明顯照抄,真係估佢唔到。而喺泛民初選辯論中,阿基嘅演辭明顯琢磨過,唔少泛民選委大讚阿基喺選舉論壇中嘅演說技巧,有別於仁哥嘅流於口號式宣傳,只講方向不談內容。咦,仁哥呢套作風,咪就係好似唐唐豬嘅問題囉,至今嘅政綱都唔夠狼振英咁確切咁噃。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載