蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年01月06日

隔牆有耳:羅孚92歲大壽《大公報》舊部設宴恭賀 - 李八方

新聞界好友今晚設宴,賀羅孚92歲生辰。
資料圖片

如果要數香港報壇風雲人物,《大公報》前副總編輯、前《新晚報》總編輯羅孚一定榜上有名。呢位響噹噹嘅報界前輩,自從1982年上京被屈成「間諜」後,就一直冇返過香港《大公報》。事隔多年,羅孚嘅一班《大公報》舊同事,今晚會喺銅鑼灣設宴,為老人家慶祝92歲生辰。

曾德成送大果籃

八方請教過一啲已退出江湖嘅報界前輩,佢哋認為唔需要將呢次擺大壽,當成係為羅孚平反,但無論點都好,一班老友有機會聚首一堂為羅孚賀壽,都係一件值得高興嘅事。今晚個壽宴開足20圍,據聞星光熠熠,《明報》創辦人查良鏞、才子陶傑同佢爸爸,即係《大公報》前要員曹驥雲、《香港左派鬥爭史》作者周奕,仲有程翔、記協主席麥燕庭等人都獲邀出席。
聽講羅孚當年喺《大公報》好器重嘅前下屬、民政事務局局長曾德成,近日都送咗個好大嘅果籃畀羅孚。

去年返過大公報坐吓

據講,最近呢兩年,北京開始畀羅孚用自己個名出書。到上年,即係2011年11月11日,大約上午11點,羅孚仲返咗去大公報報館坐吓,由報館高層親自接待,推住坐輪椅嘅羅孚四圍參觀。呢次係羅孚自從當年間諜案後,首次再踏足《大公報》辦公室。
羅孚細仔羅海雷同八方講,嗰次參觀完大公報後,就開始有舊同事商量,希望同羅孚做生日,所以就搞咗今晚呢場壽宴,大家AA制。佢哋唔會將呢場宴壽視為平反,但總算係有啲突破啦。今晚有咁多人為羅孚慶祝生日,羅海雷話爸爸都好開心。八方都祝佢生日快樂!

話你知
羅孚好猛料

羅孚係報界猛人,一輩子爬格子、做報人,贏得各界尊敬。當年20歲嘅羅孚喺桂林加入咗《大公報》,1947年嚟到香港後,48年正式加入共產黨,做咗香港《大公報》副刊編輯,後來升做副總編輯,1950年《新晚報》創刊,由佢做老總。六七暴動期間,羅孚參與過「反英抗暴」放過「假菠蘿」。佢喺1982年5月接到北京嘅電話,叫佢出席學術交流會議,點知一上到去就俾北京屈佢做「間諜」,將國家機密情報賣畀美國佬。羅孚喺內地被「軟禁」11年先重獲自由。佢係唔少文人嘅伯樂,喺《新晚報》期間捧紅咗武俠小說作家金庸、梁羽生。佢當年同時主編《文匯報》〈文藝週刊〉,開放投稿,培養咗李怡、舒巷城等作家。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載