› 選擇地區
三藩市
紐約
洛杉磯
其他美國地區
香港 台灣 北美
 
2011年12月29日

沙膽虹手記:探望半個師傅 - 沙膽虹

趁聖誕假期,到黃双如的有食緣買了一個聖誕禮籃,去探望之前幫《壹》仔寫「天下第一倉」的東尼TonyMeasor。
東尼去年秋喺屋企唔小心跌親,跌斷咗髖骨,需要做手術。本來係一個小手術,但由於手術前幾日要停薄血藥,搞到佢手術後中風,手腳活動能力受影響,連講嘢都唔係幾流利。一年多來,東尼搵咗言語治療師和物理治療師,學習番講嘢和提升手腳活動能力;但身體弱咗,轉天氣時始終容易中招,試過兩三次肺炎要入院。前一陣子,他再因肺炎入咗醫院,平安夜才出院回家,與家人齊齊整整過聖誕。
沙膽虹見到剛出院嘅東尼,穿着棉襖,明顯消瘦咗,但精神唔錯,他太太話佢一返屋企,手就指向他做運動的椅子,話要踩單車練腳力,沙膽虹見佢床上亦放了一叠教發音講嘢的notes,係東尼休息時照着練習的,可見東尼好努力,生命力好旺盛。
沙膽虹初出道做記者就識東尼,佢當時是《英文虎報》財經版阿頭。他是註冊會計師,又做過股票經紀,識睇年報,可以一針見血咁點出邊間上市公司有甚麼問題,邊間上市公司大股東常犧牲小股東利益,而且絕不手軟!沙膽虹喜歡睇他的稿和每周專欄,把他當成半個師傅。
其後東尼轉回證券行業,去咗道亨證券管理基金,最輝煌一役是八七股災前夕,佢大手沽空咗期指對冲住個倉,令他的基金跑贏晒同行。沙膽虹在約九五年就搵佢在《壹》仔開筆,寫「天下第一倉」,一寫就十五年,直到去年才封筆。
沙膽虹祝東尼早日康復。

沙膽虹

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載