蘋果日報 | APPLE DAILY
› 選擇地區
三藩市
紐約
洛杉磯
其他美國地區
2011年12月20日

沙膽虹手記:亂咁建議 - 沙膽虹

環保團體環保觸覺做咗個調查,話今年開售嘅五個大型樓盤,內地與本地買家比例為37.5與62.5之比,令香港人買唔起樓,因此建議向非本地置業人士和以公司名義買樓者(堵塞非本地人士用公司買樓)多抽一成印花稅。
名嘴香樹輝喺新城節目質疑,點解環保團體唔專心去關心空氣污染和停車熄匙,而走去調查一手樓銷情?沙膽虹亦覺得,佢哋根本唔係搞經濟呢瓣,亂咁建議,既不可行,亦唔應該咁做。
首先,環保觸覺為針對國內人士在港置業,一刀切建議向非本地置業者徵稅,咁對其他國籍人士亦好唔公平!何況,即使向國內置業人士開刀,亦唔係咁妥,唔通所有國內人士在港買樓都係買嚟炒?不少亦是移民來港工作買來自住。難道個個本地置業人士都係買樓自住,佢哋唔少亦係買來炒或投資,我哋使乜咁緊張去幫呀?
再者,為了防止大陸人用公司買樓避開這一成徵稅,環保觸覺索性建議對所有公司置業抽稅。但咁咪即係因噎廢食?影響晒香港正常的商業和投資活動?根本就冇可能和唔應該咁樣立法!
現在不少人話買唔起樓,沙膽虹唔敢否認。但沙膽虹敢講,一旦樓市急跌,買得起樓嘅香港人亦唔會去買,佢哋仍然會等低啲,等跌多啲,沙膽虹識唔少人都不斷等呀等!2008年金融風暴,樓價急跌一半,有幾多人會果斷入市?少之又少;反而在高峰時個個見買樓有得賺,人人想分一杯羮,但又買唔起,於是個個呻!佢哋咁樣,跟炒股票見高就追見低就驚,根本冇分別,永遠賺唔到錢!如果你現在想買樓又買唔起,你不用擔心,只要一邊努力存錢一邊耐心等,你驚佢唔會跌落嚟?一旦樓價跌落嚟,自己買得起,就不要驚,勇敢去買吧!
(後記:昨日手記寫黃大狀上周五陸羽擺酒,應為周四,沙膽虹竟然咁都記錯。本想推說最近《爽報》早晚版搞到頭昏腦脹,但錯就錯啦,咁多藉口?現謹向各位看官聽眾致歉。)

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載