蘋果日報 | APPLE DAILY
› 選擇地區
三藩市
紐約
洛杉磯
其他美國地區
2011年12月20日

隔牆有耳:造勢大會比拼 唐唐贏陣 輸咗自己 - 李八方

鬥演詞

正如唐唐所講,佢自己係不擅詞令,所以佢噚日份講稿都係平淡如水,無甚驚喜,稱得上係一篇行貨,毫無誠意可言,睇勻全篇都唔知香港有乜嘢問題。

成個造勢大會,唐唐乜都壓住振英哥,只係贏在自己!相反狼振英就大打溫情牌,仲擺佢紮咗三隻腳趾嘅媽媽上枱,玩首尾呼應,都算感人,明顯交足戲。

鬥司儀

狼振英宣佈參選嘅大會,請來《壹週刊》前副總編輯潘麗瓊做主持,佢嗌破喉嚨高叫「支持CY、支持梁振英」,擾民程度有十粒星,獲冊封為「爆咪姐」。唐英年可能知道「爆咪」會扣分,所以佢就請咗新聞之花魏綺珊做司儀,佢人靚聲甜,即使有食螺絲同埋deadair,但大方得體surewin。魏綺珊話,今次幫唐唐做司儀係當接Job咁做,拒評論自己係咪支持唐唐。

鬥明星

唐唐噚日台戲有周星馳、黎明呢啲「天王級」人馬坐鎮,叫座力不容忽視,二人「有咪就有bite」,「金句王」黎明更加唔會令人失望;有政治女記者噚日俾老黎掂住隻手答問題,冧到呢。現場仲有金草演員黎萱撐場,mark住班長者客。相反CY喺藝能界就遜色得多,只有肥媽MariaCordero同幽默搞手林超榮。

鬥仔女

狼振英造勢有佢22歲兼高大靚仔嘅狼仔梁傳昕現身支持,加上狼仔聲稱未拍拖,令唔少年輕女記者尖叫。唐英年噚日晒冷,帶晒佢三個女同一個仔現身,但未見傳言中嘅私生子。雖然「豬仔」唐嘉盛早前因為外貌輸咗畀「狼仔」,但係唐唐噚日嘅20歲細女唐嘉慧(Nicola)樣子夠甜,笑容夠煞食,加上低胸DeepV示人,為唐唐挽回唔少分數,但係四位千金大少全程一語不發,由媽媽代為發言,唔似狼仔咁大方。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載