› 選擇地區
三藩市
紐約
洛杉磯
其他美國地區
香港 台灣 北美
 
2011年12月19日

隔牆有耳:港大百周年 101歲校友撐場 - 李八方

梁錦松同老婆伏明霞恩愛到場。
李家皓攝

噚晚港大百周年晚宴,喺灣仔會展擺大壽,筵開365圍,老中青校友師生雲集,煲呔、賭王、狼振英都賞面出席。
一班元老級人馬為港大賀生辰,最老嘅校友係101歲半嘅李秀文婆婆,跟住就係99歲嘅何東女中學前校長謝琮賢,仲有就係96歲嘅校友甘尚武伯伯。港大前校長黃麗松今年都91歲,佢同港大前校委會主席楊鐵樑一樣撐住枴杖慢慢行入會場。

西裝友跟實煲呔

噚日真係衣香鬢影,政要雲集,前財爺梁錦松、東亞銀行「大孖沙」李國寶、金管局前總裁任志剛都有出席,范徐麗泰、陳方安生、王䓪鳴等前女高官嘉賓亦都係港大出品。
徐立之做咗九年校長,前校長王庚武讚佢過去幾年做得好,「希望佢多做幾年」,仲講咗三次。畢業幾十年,最開心梗係做「HKUCheer」啦,最興奮嗰個係HallCheer,個個都叫到面紅紅,夠晒懷舊。
港大book咗四個宴會廳,成個會展保安嚴密,仲有好多會展保安把守,煲呔出現前後,有大量黑衣西裝友跟出跟入,好明顯有警察入場啦!賭王噚晚係由乖女超瓊陪住,坐喺特首夫人隔籬。
任何場合,話題都離不開豬狼之爭。李國寶、梁錦松同葉澍堃都話今日會到會展挺唐,任志剛就好含蓄咁講:「聽日(今日)先講啦!」噚日港大終於首播歌神SamHui《明我以德》MV,雖然歌神absent,但有港大靚仔靚女校友謝安琪同許廷鏗,同師弟妹現場合唱,拍住手,仲齊齊玩人浪。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載