› 選擇地區
三藩市
紐約
洛杉磯
其他美國地區
香港 台灣 北美
 
2011年12月08日

隔牆有耳:唐唐會網民喪笑遮醜 - 李八方

被形容係豬嘅唐英年,終於肯承認自己係「豬」。噚日佢同網民對話,有巴打質問「龍年出生」同「蠢」有乜關係,佢開頭好得戚咁將個波拋畀主持項明生,點知項明生夠坦白,話就算係豬都可以好聰明。不斷喪笑嘅唐唐俾人講中死穴,惟有笑住話「啱」,但都補番句唐氏綜合語錄,仲拋書包,「我係個homosapiens,係動物嘅一類」。

笑對瞓棺相:死一次好夠

「homosapiens」係拉丁文,指有智慧嘅人。唐唐有冇智慧留番畀巴打判斷,但佢肯定係高登紅人,一幅瞓棺材惡搞死人相紅遍網海。噚日佢望住自己幅「死人」圖,以笑遮醜之餘,都大讚巴打有創作力,「但係我死一次,我覺得我都好夠」。
被人惡搞笑幾句就容易過關,但講到社會深層次矛盾,貧富懸殊問題,呢位富二代就露底。佢話好多市民覺得社會唔公義,好似大學畢業10年都係搵得嗰萬零二萬蚊,生活相當困難。八方聽到眼都凸,照佢咁講,基層市民賺得幾千蚊咪唔使生活?
俾人笑足全場,唐唐可能心有不甘,有巴打話佢喺兆基書院造勢,係騎劫「創意」個名。等足成粒鐘,終於有發威機會,佢話兆基一向都有租場畀街外人,唔覺得係騎劫,仲寸嘴話:「『創意書院』冇一個專利on創意」。有記者借啲意問佢,俾人大聲問問題係咪令到選舉劣質化,畀晒位佢入;佢話唔多覺,「有時候覺得好多人問問題,你唔夠大聲係問唔到」,仲話尷尬問題聽唔少,係記者責任。
雖然個活動歷時一個鐘頭,但有45分鐘都係主辦單位「網民力量」同業界提問,好似「度身訂做」,唐唐只重複舊話,再講八方都嫌嘥口水。網民提問僅15分鐘,問題經篩選,唔夠抵死啜核,好似有巴打就問「唐先生,請問你的性生活美滿嗎?」、「請問袁莎妮正唔正」,就被叮走。
「網民力量」有份參選特首選委會IT界別分組選舉,項明生等候選人藉今次活動喺網上大賣廣告,八方溫馨提示,記住計入選舉經費,否則好長手尾㗎!
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載