蘋果日報 | APPLE DAILY
› 選擇地區
三藩市
紐約
洛杉磯
其他美國地區
2011年11月07日

隔牆有耳:潛行票站--九龍東
莫應帆環保唔派傳單 - 李八方

民協莫應帆面對工聯會林文輝挑戰,卻選擇唔派傳單,實行環保選舉。

九龍東除咗人民力量任亮憲狙擊工聯會陳婉嫻,但其他選區都好有睇頭。好似讓路畀嫻姐角逐超級區議員嘅林文輝,走咗去東美選區挑戰民協嘅莫應帆。佢哋兩個噚日都承認選情緊湊,但面對呢場硬仗,做咗26年區議員嘅莫應帆居然仲夠膽唔派宣傳單張,話要靠平日同街坊嘅接觸,打動選民投佢票,實行環保選舉喎。

胡志偉踩單車拉票

至於上屆票王、民主黨嘅區議員胡志偉,今屆都面對有九龍社團聯會暗撐嘅郭善甄挑戰。胡志偉好淡定,噚日雖然只得兩三個義工幫手拉票,比起佢嘅對手長期有成十個八個義工顯得輸蝕啲,但胡志偉冇有怕,相信選民會睇到佢咁多年嚟嘅地區工作,而且佢仲有個好幫手──單車。原來佢喺架單車加咗音響,平時會喺選區裏面邊踩單車邊嗌咪宣傳,但噚日有票站限制,所以只能夠泊架車喺路邊當做音響車。胡志偉雖然人丁單薄,但佢嘅對手卻只係得把聲,事關八方噚日喺拉票地方企成半個鐘,都冇見過佢嘅對手現身。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載