› 選擇地區
三藩市
紐約
洛杉磯
其他美國地區
香港 台灣 北美
 
2011年10月13日

隔牆有耳:扮老友 林D9握泛民手 - 李八方

林D9同吳靄儀握手後,又逐一同其他泛民議員握手。
何柏佳攝

立法會新大樓由煲呔「開光」,噚日主角係宣讀施政報告嘅特首(其實長毛放個氣球show「煲呔禍港,官商勾結」嘅長紙條先係焦點),不過講到搶鏡,剛剛升官發財嘅林D9標青好多,面對市民遊行要求佢下台,民主派政黨鬧到佢七彩,佢依然面不改容,噚日去到立法會,即深入泛民陣營同泛民議員輪流握手,表現親和仲好相與過友誼小姐。

chok住揮手

林D9噚日首次以政務司司長身份出席立法會會議,入場後即時行埋去與泛民議員打招呼,仲逐一握手。狠批林D9嘅公民黨幾個大狀,余若薇、湯家驊、吳靄儀等通通有份,民主黨卿姐都有,八方現場所見林D9都有同長毛打招呼。
林D9升官後話會同各黨派合作,呢啲官話,講就容易,做唔做得到,八方都係嗰句,聽其言,觀其行,握手只係姿態,唔能夠洗刷林D9做過嘅「好事」。除咗林D9,另外兩個新升職嘅官員譚志源同梁卓偉,噚日都有主動同議員握手,不過表現就冇林D9咁chok。

大樓大到誇

噚日係立法會首次喺新大樓開會,呢幢新大樓遠觀誇啦啦,近睇好鬼差,市民睇電視見到個會議廳好宏偉,實情裝修好多甩漏,據講有啲枱腳飛脫,枱面又凹凹凸凸,分分鐘損手,估計執漏需時最少一年。
好多議員未熟悉新大樓,噚日竟然迷路,想搵洗手間入咗記者室,記者想去會議廳,卻入咗手語傳譯員間房,總之好多蝦碌事情發生。首次到新大樓嘅自由黨田少話,佢自己身為發展商,都覺得新大樓闊落得有啲誇張,似在暗寸議員冇乜理由要佔用咁多地方,話晒添馬艦地皮值錢,條數好襟計。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載