蘋果日報 | APPLE DAILY
› 選擇地區
三藩市
紐約
洛杉磯
其他美國地區
2011年09月16日
馬上成為壹會員

隔牆有耳:爭特首選委席位 醫學界大鬥法 - 李八方

特首跑馬仔唔單止疑似候選人鬥得難分難解,連醫學界30個選委席位,都掀起各大門派爭奪。雖然年底先選舉,但各三路人馬已就位,醫學會最叠馬,成功拉攏前線醫生聯盟等三個團體;公共醫療醫生協會(PDA)無埋堆,堅持用自己「字頭」出戰;前醫管局高層高永文則與六大名醫結盟成「七君子」,恐怕,江湖從此多事…。

醫學會最叠馬

今屆選委醫學界議席由20席增至30席,難怪群雄虎視眈眈,醫學會會長蔡堅噚日向八方透露,已成功拉攏前線醫生聯盟、牙醫學會及執照醫生協會連線出選,蔡醫指四個會嘅會員人數約9,000人,暗示實力相當。
蔡醫又話想搵PDA埋堆,以集中票源,佢聽聞PDA想派15人出戰,「如果佢哋有7個當選都好好彩」。八方即刻問PDA主席蘇潔瑩,蘇姐卻話幾個星期前已婉拒蔡醫,事關PDA今年好多年輕醫生想參選,預計有10幾人上陣。
八方聽聞由於醫學會等四個會已經湊夠腳30人組隊出選,無預位畀PDA,既然如此,PDA何必為人作嫁衣裳?

高永文扯頭纜

活躍政界嘅高永文亦扯頭纜出選,網羅唔少資深醫生,包括骨醫潘德麟、兒科周鎮邦、廣華醫院外科葉維晉、曾經幫前律政司司長梁愛詩醫腸癌嘅外科醫生朱建華,同腫瘤科醫生羅鎮邦,仲有著名骨醫方津生,呢個「七君子」名單,人人獨當一面,相信有號召力。有醫學界中人話,上屆醫學界選委投票率唔夠五成,因為大家無興趣小圈子選舉欽點遊戲,今次似乎有得揀,相信競爭會好激烈,醫學會則話會做民調,跟選民意向投票,最快下個月初同唐唐見面。
除咗醫學界,泛民主派近月都積極動員角逐選委會,但成績暫不樂觀,因為連泛民「陣地」法律界至今仍未找到足夠人數出選,而商界今次亦破天荒有泛民候選人,就係邵逸夫姪孫邵在德同民促會高德禮。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載