› 選擇地區
三藩市
紐約
洛杉磯
其他美國地區
香港 台灣 北美
 
2011年08月30日

隔牆有耳:鼠王芬區選前 鼠輩又橫行 - 李八方

梁美芬外號「鼠王芬」,佢個朵源於上屆立法會選舉時,主打九西鼠患問題,仲搵埋廣州嘅「中國滅鼠大王」李鏡就出手捉鼠,結果成功上位。嚟緊11月區議會選舉,佢再次引「鼠」出洞,噚日開咗個記招,公佈九龍西五個街市嘅衞生情況。呢個調查訪問咗千名街坊同商戶,發現石硤尾街市衞生環境最差,緊貼其後係土瓜灣、花園街、紅磡同深水埗保安道街市。

「責任不在我」

不過,一齊開記招嘅旺角居民協會副主席黃建新唔知係擦錯鞋定還是有心暗寸鼠王芬當選咗就滅鼠不力,竟然好感觸話2008年梁美芬搵廣州鼠王後,當區鼠患問題確係紓緩咗,但係好景不常喎,呢個情況維持冇耐就打回完形,九西鼠輩橫行仲日益嚴重﹗
黃建新話中有話,八方忍唔住問鼠王芬,係咪每逢選舉年先出動滅鼠博宣傳,佢斬釘截鐵否認,仲大大聲反駁當區鼠患問題嚴重「責任不在我」,因為政府有大把資源搞好衞生,所以唔應該將責任推在地區人士身上,講到明唔會為政府啃呢隻死貓喎。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載