› 選擇地區
三藩市
紐約
洛杉磯
其他美國地區
香港 台灣 北美
 
2011年08月30日

隔牆有耳:獵鷹行動萬眾一心 - 李八方

公民黨都加入獵鷹行動。張志華攝

禿鷹噚日踩入立法會,依然死不認錯,堅拒道歉。不過呢啲都係意料中事,唔少社運人士預咗呢隻鷹係咁寸嘴,大早就準備咗喺議事堂內外「獵鷹」,用直接行動向佢表達不滿。社民連、人民力量、民主黨、民協等團體過百人噚日喺立法會外守候。事旦男整咗張大紙牌,貼上利比亞狂人卡達菲同埋禿鷹兩張大頭相,話一個係狂人,一個係儍人。

移形換影棄用1號車

禿鷹可能聞到味,先嚟一招移形換影,棄用1號車牌座駕,改坐AM車牌白色七人車到場。示威者冇預過禿鷹會換車,當佢落車之際,大家才如夢初醒,人民力量成員於是臨急向佢擲紙飛機。但係禿鷹身手都算唔錯,唔使G4保護,自己一個人好快手咁落車步入立法會,全程都冇俾飛機掟中,順利過咗第一關。
咪以為集會人士一面倒唔妥禿鷹,噚日竟然有一班師奶,走到立法會外話要撐警察。家庭主婦李女士話唔鍾意咁多「不理性」示威,但就唔係好知「六四男」事件,同埋香港大學有學生畀警察禁錮囉。
獵鷹行動Round1並唔算成功,入到議會內仲有續聞。裏面開開吓會,公眾席上突然有人起身舉起海報大鬧禿鷹,原來係維園阿哥任亮憲出手,但好快就俾立法會保安趕走。黃毓民跟住向禿鷹兜口兜面掟六四tee,點知禿鷹嚟唔切反應避唔到。

六四男贈《安保陷阱》

禿鷹今次忠心護主搞到咁多仇家,麗港城六四男王先生、港大哭男李成康噚日都有出現。六四男王先生當日俾禿鷹手下粒聲唔出抬走,佢噚日帶咗一張寫上「濫權謀私,可恥;謊言,狡辯,可惡;盡快認錯,悔改」嘅標語去抗議。六四男平時有夾band,佢將譚詠麟首《愛情陷阱》改編做《安保陷阱》,歌詞抵死話:「我要見你,只想將心聲吐露,正義!」六四男話遲啲會唱畀老婆聽,認真浪漫。
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載