蘋果日報 | APPLE DAILY
› 選擇地區
三藩市
紐約
洛杉磯
其他美國地區
2011年08月18日

謝子祺最想畀葉太鬧

被視為葉太愛將的謝子祺。 孔慶初攝

保安局前局長葉劉淑儀06年若不回港從政,29歲的謝子祺(Marcus)今天或許仍是天天坐在冷氣房的IT人,毋須大熱天上門為街坊修理電視機。「可以咁講,冇葉太就未必有我」,08年由葉太議員助理做起,3年來被鬧過被抦過,終於從嚴師身上練成一身好武功,有望在11月底的區議會選舉初試拳腳。

有意在太古城出戰

雖自小對政治感興趣,卻苦無發揮機會,城市大學電腦工程系畢業的Marcus坦言:「都無邊個政治人物我想去幫。」04年畢業後,順理成章當個IT人。直至葉太學成歸來大變身,Marcus潛藏多時的政治心火即時燃起,「當年(06年)見到佢竟然識得同傳媒講笑,我就覺得:呢個高官變晒喇,唔係嗰位以前推銷23條好乞人憎嘅官喇。」
08年立法會選舉,Marcus自動獻身為葉太助選;葉太當選後,他更即時應徵議員助理,「竟然又畀我過到關喎」。09年他被葉太委以重任,坐鎮東區辦事處,展開非一般的地區生涯,「除咗一般啲求助個案,原來就算電視機有少少雪花,啲街坊都會叫我上門修理;有啲嘢,真係估佢唔到。」
葉太出名嚴格,身為愛徒的Marcus坦承被鬧過又被抦過,卻心甘命抵,「佢要求係好高,但至少肯畀機會年輕人;其實畀佢鬧、畀佢提點吓都係好事,至少我可能會第二次犯錯,但絕對唔會有第三次。」有意在太古城踏出從政第一步的Marcus,首要工作包括讀熟家居維修天書,「要等住整埋其他電器㗎嘛」。這種自嘲式幽默,也極可能是從嚴師身上學到。
記者:許偉賢

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載