› 選擇地區
三藩市
紐約
洛杉磯
其他美國地區
香港 台灣 北美
 
2011年08月01日

中環行蠱惑:警界「奇葩」傍實卡仔 - 細莊

細莊月前接咗單job,忙咗幾個禮拜,上星期搞掂,趁得閒去老蘭happyhour,拎住支啤酒未坐低,就撞見個大狀朋友。細莊同呢位大狀以前玩得埋啲,透過佢識咗個commonfriend,呢個friend堪稱傳奇,值得一談。

停職期間讀法律

呢個傳奇人物叫PeterPannu,目前係英冠球隊伯明翰署理主席,本身亦係大狀,佢老闆「卡仔」正被警方調查洗黑錢案件,細莊同大狀朋友都覺得「卡仔」最終未必會有事,因為「卡仔」嘅左右手Peter精於處理刑事畸士,而佢自己嘅經歷就係最佳例證。
Peter未做大狀前係警隊高級督察,長時間做反黑,同另一印巴裔督察合稱「印巴雙煞」,心水清者,可能對佢嘅事迹記憶猶新,事關佢當差時,好幾次因為恐嚇或者毆打俾人告上法庭,而最大單係1996年俾警隊指佢收咗江湖中人「灣仔之虎」陳耀興賄賂,唔少叔父輩對呢段往事記憶猶新。
雖然快勞咁精采,不過Peter每次都打得甩,而佢更喺案件調查及審訊期間,利用被停職嘅七年時間,讀完法律學位兼且考埋大律師資格,咁識善用時間,係咪江湖傳奇先?更神奇係佢停職期間可以收足當差份糧,警隊畀議員質疑浪費公帑,搞到當年一哥曾蔭培好尷尬。有Peter咁嘅奇才喺身邊,「卡仔」或者可以逢凶化吉呢。
逢周一刊出

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載