› 選擇地區
三藩市
紐約
洛杉磯
其他美國地區
香港 台灣 北美
 
2011年08月01日

隔牆有耳:政府洗太平地 迎名城入伙 - 李八方

李嘉誠旗下嘅「香港正中心」入伙冇耐,泊喺附近路面嘅單車就俾人狂掃,又幾巧合喎!

富豪就可以霸公路起大閘,但小市民喺路邊泊部單車,轉個頭就會俾人「拖車」。真係o架,車輛違泊阻街俾人鎖車就聽得多,但係原來佔用空間唔算好大嘅單車,喺條街度擺耐咗一樣會俾政府鎖車充公,轉個頭仲拎去拍賣埋㖭。
八方發現有班單車用家,近日喺facebook成立群組,原來唔少人都有相同經歷,就係架心愛嘅單車喺街上擺咗一日左右,就以後都搵唔返天人永訣。

政府部門勤拖單車

香港地近年唔少人踩單車代步,貪佢夠環保皮費又低。但有單車友發現,政府近日充公單車嘅情況好似變本加厲,尤其以大圍區更加嚴重。有單車友猜測,可能係因為標榜位處「香港正中心」嘅名城入緊伙。咁豪宅周邊地區當然唔可以泊到成街單車啦,所以政府咪加強咗嗰區嘅執法行動囉。於是呢,所有單車喺街邊擺超過24小時,就一定俾地政總署等部門鎖咗拖走。
有單車友向環保團體反映問題,佢哋話唔係想吓吓都違泊,但街邊真係冇單車泊位,只可以泊喺路邊,結果架車好快就不翼而飛,真係左右做人難咁話。其實政府但凡充公咗單車,都會搵物流署定期拍賣,有人統計過呢半年嚟,各部門已充公咗6,220架單車拍賣,為庫房帶嚟15.9萬嘅收入。不過呢筆錢連「正中心」一個單位嘅廁所都買唔起囉。

登記競投「贖」愛車

被拍賣嘅單車,平均每架只係值25.6蚊,呢個價,只夠買張港鐵單程票,由天水圍搭到去上環咋。至於充公單車重災區,就係元朗,半年嚟已經有2,000幾架單車俾人沒收。
唔少單車友架愛車俾政府充公後,都唔知去邊度贖返。地政總署曾經話過,充公嘅單車會存放喺政府扣押場,「有興趣參與拍賣」嘅人,要去政府物流服務署嘅政府物料營運中心登記參與拍賣競投。
若果政府肯增加街邊單車泊位,就唔使用咁多公帑搞拍賣啦。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載