› 選擇地區
三藩市
紐約
洛杉磯
其他美國地區
香港 台灣 北美
 
2011年07月26日

隔牆有耳:掛錯區旗 銀紙照抄 - 李八方

滙豐100元新鈔印錯特區區旗,成為國際大笑話,點知笑話陸續有嚟,有讀者爆料話滙豐設計師係睇住金紫荊廣場升旗禮張相設計,換言之有人升錯旗。究竟邊個係罪魁禍首?八方都唔敢肯定,事關當初呢個區旗設計,已經俾好多人大彈「唔老利」,但基於政治正確先獲採用。礙於《基本法》嘅限制,區旗絕唔可以隨意修改,睇怕大家都要預計烏龍掛區旗事件陸續有嚟。

網民杯葛洗腦100蚊

作為最大發鈔銀行,竟然擺咗咁大烏龍,真係貽笑大方。滙豐噚日回應話,家仲研究緊件事。八方聽聞佢哋喺度「補鑊中」,正在設計緊新鈔;至於邊個程序出錯、邊個人要孭飛,相信都係後話。
有市民喺社交網站成立「港人拒收滙豐洗腦媚共新100蚊鈔票大聯盟」,反對新鈔印上7.1回歸巡遊式樣,原因係新鈔有洗腦之嫌,令人感到好不安。聯盟負責人張先生話日內去信滙豐要求解釋,仲會尋求法律意見,試圖禁制洗腦新鈔發行,聲言唔排除採取其他杯葛行動。
特區區旗出錯唔係罕見,06年左派團體發起慶回歸7.1大巡遊,向市民派發嘅小區旗就誤將洋紫荊花瓣尖的逆時針方向變成順時針方向。00年特區區旗首次喺奧運會場飄揚,區旗上嘅洋紫荊花瓣都較正常肥大,黃金寶奪得佳績,港協會長霍震霆等人拉起區旗影相時又上下倒轉。
其實有前港英高官同八方講,當年港英唔少高官睇到呢個區旗區徽設計,已經大叫「肉酸」,更有警察對頭上嘅皇冠變成紫荊花都好不滿,覺得頭上戴花係唔吉利,其實當年阿爺為區旗區徽搞設計比賽,唔少作品都幾好,但阿爺全部唔滿意,結果又搵何弢等三位設計師重新設計,於是就整咗呢個區旗區徽出嚟。

呢個前港英高官又話,當年有傳聞話,阿爺最愛呢個紅色兼有紫荊花嘅設計,就係貪佢夠政治正確,同港英殖民地個徽章完全唔同,但絕冇估計呢個咁老土嘅設計後患無窮,成日出事,唔係掛旗上下倒轉,就係方向搞錯,有人覺得索性改咗佢就仲好啦。但有法律界人士就話機會微乎其微,事關香港嘅區旗法已經限定區旗嘅式樣、大小同角度,若然要改動,就要修改《基本法》,點可能得到中央批准?

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載