蘋果日報 | APPLE DAILY
› 選擇地區
三藩市
紐約
洛杉磯
其他美國地區
2011年07月25日

隔牆有耳:三代上海妹政壇接力 - 李八方

陳太(右一)專程捧場,力撐公民黨余大狀(右二)同陳淑莊(左二);旁為李鵬飛。
黃賢創攝

香港政壇祖籍上海嘅女士唔算太多,但單單一個公民黨,就已經有兩個。前黨魁余若薇以及陳淑莊(Tanya)皮膚白淨兼夾身形高䠷,具備上海妹嘅特質。同姓三分親,同鄉就親上加親,前政務司司長陳方安生都係上海幫,自然對呢對公民黨上海雙妹嘜寵愛有加;就算噚日30幾度高溫,都專程去到筲箕灣,為佢哋主持新辦事處開幕儀式,祝願新一代上海妹青出於藍。

相關新聞:隔牆有耳:余大狀迷倒克林頓

勸余大狀選超級區議員

祖籍安徽嘅陳方安生由於喺上海出生,一向自視為上海人。噚日陳太出席余大狀同Tanya嘅新辦事處開幕禮,同場主禮嘅李鵬飛就即場揭發,原來在場有唔少上海妹喎,陳太聽到即時展現招牌四萬笑容,笑笑口話「係喎,我哋三個都係上海妹」。似乎好開心政圈內嘅上海女人幫後繼有人。佢大讚余大狀同Tanya處事有原則,立場鮮明,向兩位後輩送上十萬個like。
飛哥對上海妹顯然特別有要求,2007年支持陳太參與港島區立法會補選,今年就力挺余大狀參選「超級區議員」。其實飛哥唔只一次勸上海小妹余大狀去馬,覺得佢應該先選區議會再選立法會,認為余大狀絕對有能力喺全港攞到60萬至80萬選民支持。噚日飛哥更加用心良苦,喺辦事處開幕禮上公然勸余大狀回心轉意,希望第N次嘅鼓勵會轉化為事實。可惜群眾壓力暫時未有效,余大狀至今未見動搖,強調公民黨對呢個新增功能組別有保留,派唔派人參選都未有決定,現階段都要再請飛哥食檸檬咯。

Tanya東區出世住足30年

至於三位上海妹中最年輕嘅Tanya,雖然未有喺噚日接收政壇元老嘅「聖旨」,但就表明會繼續為人民服務。Tanya原來喺東區出世,仲一住就住咗30年,對呢區特別有感情。新辦事處未正式開張,已經搶閘接到「生意」,有市民要求佢搞好街口路面不平均問題,Tanya一口答應積極跟進。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載