› 選擇地區
三藩市
紐約
洛杉磯
其他美國地區
香港 台灣 北美
 
2011年06月04日

隔牆有耳:司徒華回憶錄書展推出 - 李八方

忘不了的,年月也不會蠶食,六四22周年,八方忘不了那些英靈,也忘不了今年初病逝嘅華叔。噚日正在想沒有華叔嘅燭光集會是如何之際,忽然收到消息,華叔回憶錄已完稿,下月書展推出。
華叔過身後,其回憶錄何時出版、由誰執筆備受關注,初時傳出可能涉及遺產問題而出版無期,又有消息話由於華叔病情急轉直下,未及撰寫,因此出版回憶錄意願可能落空,家佢本回憶錄出版有期,再次證明華叔做事真係有遠見。

生前寫下自序

據了解華叔回憶錄由牛津大學出版社出版,負責人林道群證實已完稿,正編輯及核實內容,不過佢不允透露詳情,只肯講書名係華叔親題,名為《大江東去:司徒華回憶錄》,現時擬只出精裝版,售價未定,「我哋唔當係牟利咁做,希望多啲華叔支持者買到」。
八方從不同途徑收到消息,回憶錄會以華叔照片做封面,揀邊個年紀嘅相未最後拍板。全書由六個部份、42章組成,仲有多篇附錄,大約500頁共30萬字,最少有50張華叔生平相片。華叔生前更預先寫下自序,知情者稱:「成本書都係按華叔意願去做。」
華叔唔做議員後已着手寫回憶錄,因此書中有唔少內容係華叔親撰,其餘係根據口述錄音而成,據講由於華叔回憶錄內容幾爆炸性,因此會有附錄詳述成書過程,包括說明邊啲內容係華叔自己寫,邊部份係錄音紀錄等,真係由頭到尾都咁精采。

版權屬其家人

民主黨悼念華叔嘅文集《功成必有你在》今日出街,大家喺維園見到不妨幫襯,因為部份收入撥捐支聯會;而下月出版嘅回憶錄,版權屬華叔家人,暫時未知會否將部份收入捐畀支聯會或教協個華叔教育基金。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載