› 選擇地區
三藩市
紐約
洛杉磯
其他美國地區
香港 台灣 北美
 
2011年03月21日

隔牆有耳:食神 美食敢死隊 - 李八方

設計圖片

天威難測,唔知幾時再有大地震海嘯,好多人家陣聞日本色變,紛紛取消遊日行程,特區政府亦呼籲港人離開東京或盡快返港,不過「食神」梁文韜就話冇有怕,上禮拜日(13號)如期帶團去大阪,玩足幾日飲飽食醉。拜得神多自有神庇佑,食得嘢多樂悠悠,全團人日前順利歸來,韜哥話當地市面平靜,加上美食當前,地震都唔驚得咁多。

全程米芝蓮懷石料理

港府呢個月12號,即日本大地震發生翌日向日本發出紅色旅遊警告,韜哥13號如期帶團去大阪,佢話呢次係帶老友去食好嘢,由於機會難得,可一未必可再,所以無懼紅色旅警,拍拍心口就上機去也。呢個大阪團仲參觀咗附近名勝好似清水寺等,戲肉則係食盡大阪好嘢,「全程都係食米芝蓮餐廳、懷石料理」。
由於大阪距離災區較遠,韜哥話情況基本上冇乜異樣,不過佢覺得市面情況確係略為淡靜咗少少,始終災難當前,對遊客心情唔多唔少有啲影響,而酒店亦好爆棚,有人話係部份接近災區嘅人避災而至。
天災加上輻射威脅,日本食品出口大受影響,瑤柱、鮑魚等海味甚至有斷貨危機,韜哥話佢做圍村菜,材料平民化,呢啲貴價食材貨源短缺對佢影響微乎其微,短期而言對飲食業行家應該亦冇乜嚴重打擊,因為日本海味向來價錢高,一般食肆唔會用,真係用日本貨嘅食肆則唔憂無貨賣,「大部份都唔係家先入貨,有好多貨喺倉o架」。
今次大阪行盡興而回,韜哥話短期內無意再遊日本,唔係驚有地震海嘯,而係接手改革嘅灣仔榮華酒樓本月底登場,現時要趕工做足準備,「要日日落舖頭睇實,邊有時間帶團去旅行」。

蔡瀾短期內唔去日本

講開啲日本飲食達人,食家兼作家蔡瀾年輕時曾留學日本,所以上至日本料理,下至日本文化習俗佢都非常熟悉。日本發生大地震,八方噚日打電話畀蔡生,睇吓「搵食」計劃有否受影響,但佢心情明顯麻麻哋,講唔夠兩句就想收線,叫八方唔好再打畀佢。言談間蔡生話短期內冇計劃去日本,「專欄呢幾日都冇寫(日本災難)」,相信係認為多一事不如少一事。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載