蘋果日報 | APPLE DAILY
› 選擇地區
三藩市
紐約
洛杉磯
其他美國地區
2011年01月28日

隔牆有耳:女神棍維園橫行 - 李八方

選民力量嘅「民主女神棍」、「民主扇」及「卿姐七友」咕,全部衝住民主黨而嚟。

發新年財樂園維園年宵開波,八方第一時間到場睇睇有乜好嘢。猶記得去年件「禮義廉」T恤賣到斷市,民建聯嬲到向海關舉報要政府掃場,今年民建聯避走到荃灣年宵,驚再俾人玩殘,代之而起成為諷刺對象嘅係白鴿黨。擺出戰鬥格揚言追擊白鴿黨嘅「選民力量」,今年製作三大年宵精品為白鴿黨「開年」,唔少市民見到都愛不釋手,選舉勝負未知,呢盤生意贏錢,應該冇難度。

件件產品夭心夭肺

白鴿黨去年向阿爺交心,成功起錨通過政改方案,「選民力量」為咗表揚白鴿黨人,特別推出賀年精品,八方覺得必買嘅一定係以卿姐做主角嘅「民主女神棍」,呢碌吹氣棒外剛內柔,真係見棍如見人,象徵無數香港人被卿姐一棍扑醒、當頭棒喝,民主夢醒嘅痛苦經歷,「民主女神棍」每支賣48蚊,當係買個教訓,真係抵到震。
不滿起錨政改方案嘅人,唔少家陣仲怒火中燒,想消消氣,可以買把「民主扇」,呢把紙扇好犀利,宣傳口號係「民主黨,跣香港」,一撥就跣晒全港市民,每把扇定價48蚊,八方拎上手隨意撥咗幾撥,唔知點解,雖然氣溫僅十幾度,卻越撥越㷫,撞鬼佢吖!
為免撥得太「行」再跣香港,八方暫時放低把「民主扇」,見到有個卿姐與六個支持起錨方案白鴿黨議員肖像嘅「卿姐七友」咕,造型十分趣致,負責睇檔嘅「選民力量」林雨揚立即狂sell,話個咕軟腍腍,長者用最好,花68蚊買個畀阿爺墊屁股,包保老人家笑呵呵。
林雨揚話呢幾件實用精品限量生產數百件至1,000件,售完即止,復刻無期,有買趁手咁話。其他政黨賀年產品相形見絀,公民黨有余若薇墨寶書籤,「經濟動力」義賣暖腳套,而分裂嘅社民連,今年氣勢大不如前,去年暢銷嘅長毛、黃毓民、大嚿figure,今年因為兩人已退黨而抽起唔賣,一年之前,邊個會想到有此一日呢?

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載