› 選擇地區
三藩市
紐約
洛杉磯
其他美國地區
香港 台灣 北美
 
2010年11月05日

隔牆有耳:煲呔遊世博中伏 - 李八方

阿思(左)喺世博被邀請同特首傾偈,特首仲將合照放喺facebook抽水。

煲呔早前遊上海睇世博閉幕,佢嘅facebook專頁「上亞厘畢道」走在最前線,上載咗啲同世博香港職員笑住傾偈嘅官式照片。有個在西班牙館工作嘅香港女仔,煲呔暱稱佢做「阿思」,又感謝阿思「深刻」分享,但原來背後有段古。煲呔一心諗住影張相做吓親民騷,點知中伏,俾阿思寸到黑面。

竟然問人有冇蝦過佢

「上海肉搏最後一日,偉大的香港特別神經區神經長官撥冗來訪敝館,本人臨危受命落去招呼……」在西班牙館做公關嘅阿思見到上亞厘畢道專頁啲相,覺得有必要將真相講出嚟,寫咗篇《上海肉搏記》嘅note。煲呔伉儷本周一去西班牙館參觀,阿思自我介紹係香港人之後,煲呔冇乜反應,反而隨員「驚為天人」。
原來隨員睇中阿思,同佢講特首想見佢。阿思見得閒就赴會,煲呔一見到佢,即刻好熟咁握手:「好高興你肯過嚟同我傾偈呀!」聽到阿思話之前做過記者,煲呔話:「咁你之前有冇蝦我呀?哈哈哈!」阿思開始出招:「突手,邊有人會蝦到你呀!哈哈哈!」
戲肉嚟喇,有機會同特首對話,阿思指世博可以畀西九借鏡,多啲同公眾討論展覽內容,而唔係建築外形。煲呔懶醒抽水:「啲保育人士成日話呢樣唔拆得嗰樣唔起得,但如果你唔活化佢,佢就只係得個殼。」阿思反擊:「人哋外灘係金玉其外呀,但你香港連個殼都冇嘛,呢樣嘢你冇得賴啲保育人士喎。」阿思又話西九要有多啲休憩空間,「唔係掛住起完M+起豪宅」,此時,煲呔EQ失控,開始黑面。

15分鐘分享不歡而散

煲呔轉話題,問阿思喺世博呢半年學到啲乜。阿思再出拳:「認識到香港嘅優勢已經再唔係硬件,人哋上海已經超越我哋啦。我哋人文素質嘅優勢要加以鞏固。要搞西九、亞運,應該先向上海學習吓囉。」搞到煲呔塊面黑到無可再黑,15分鐘分享不歡而散。
煲呔走後,特首辦人員問阿思對香港館有乜睇法,佢答兩個字:「嘥錢!」某官員喜見知音人,忍唔住話"Isharewithyou!"

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載