› 選擇地區
三藩市
紐約
洛杉磯
其他美國地區
香港 台灣 北美
 
2010年10月13日

隔牆有耳:倒董「建華」棄戰友做警花 - 李八方

街頭戰士可以變成尊貴議員,世事有時就係咁奇妙,03年民怨沸騰,卿姐、阿牛等人振臂一呼組成「民主倒董力量」,當時甚有聲勢,後來老董腳痛下台,大家功成身退,當中一個核心成員邱建華,更加脫離社運行列去咗做警察,周不時俾上頭調派去西環「勤王」,令昔日戰友十分驚訝。

女長毛憤怒撕合照

「女長毛」雷玉蓮今年10.1去西環示威,例牌俾大批警察攔截,蓮姐話雙方對峙期間,企喺佢面前阻佢前進嘅女警,竟然係幾年冇見嘅舊戰友邱建華。蓮姐話當時兩人面對面,佢驟見舊戰友身穿警服,成個人呆咗,以為自己眼花!
邱建華係「民主倒董力量」秘書,當年剛入讀珠海書院新聞系,站出來高調倒董,搞到校方要出聲明同佢劃清界線,後來佢淡出,風波不了了之。姓董嘅建華落台,姓邱嘅建華近年亦絕迹社運圈子,蓮姐同八方講,邱建華做警察令佢好震驚,足足10日時間先可以冷靜下來,日前去一個慶祝雙十節飯局,問社運界朋友,終於證實昔日戰友原來真係走咗去陀槍,蓮姐話覺得好嬲,㷫到撕爛晒兩人合照。
蓮姐憶述,當年同邱建華拍住上街倒董,仲記得邱建華呻過,唔係咁鍾意「倒董力量」蕭若元開會時猛爆粗。家陣對方係特區警察,蓮姐話邱建華好落力攔截示威者,應該係一個盡忠職守好警察,「祝佢扶搖直上,身體健康」。

阿牛:職業無分貴賤

另一倒董健將阿牛稱,其實早就知道邱建華當差,因為有次喺柴灣警署報案室見過佢,不過大家已經冇乜偈傾。對於戰友加盟政府,阿牛冇蓮姐咁大反應,只係話:「職業無分貴賤。」八方搵邱建華朋友八卦吓,聽聞佢大約兩年前加入警隊,投考時有交代倒董經歷,都照樣獲聘用,證明警隊唯才是用冇政治歧視。據講邱建華都係在7.1、10.1呢啲大時大節,需要多啲女警應付女示威者時先會俾上頭抽調去幫拖,執勤時見到舊戰友冇乜特別感受,總之做好呢份工啦。
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載