蘋果日報 | APPLE DAILY
› 選擇地區
三藩市
紐約
洛杉磯
其他美國地區
2010年10月11日

隔牆有耳:137對新人註冊 包括女主播
十全十美諧連理 - 李八方

世紀好日終於殺到,全港噚日陷入結婚暴潮,吉時到屋苑下面閒閒哋泊住幾部花車,街頭巷尾都見到人盛裝「mua…mua…」咀到唔停得口,唔單止婚姻註冊處註冊人數創新高、138個名額用盡(但有一對甩底),聖堂門口掛晒花鐘,私人證婚場所都人頭湧湧,觀禮嘅人企晒出街,連平日比較少人book嘅小型中式婚宴場都爆到嘭嘭聲,中國人對數字嘅迷戀,再創歷史傳奇。

搵朋友一齊上網登記

今年情人節求婚成功嘅陳生,為咗爭得完美中嘅極致,同女友三個半月前call行老友,十幾友晨早彈起身click爆婚姻登記處網頁,結果幸運中標,book到10月10號10點正註冊呢個神聖時刻,陳生讀誓詞嗰陣有少少緊張,佢話呢個日子結婚有十全十美嘅意思,註冊完之後擺cocktail,明年先補擺喜酒。
10月10號生日嘅石生,之前都係發晒力希望book到完美時刻,最終只係揀到10點半註冊,不過無損一對新人心情。石生話兩個人拍咗五年幾拖都係等今日,雖然落住毛毛雨不過都好開心,但就同八方呻酒席好難book,問咗六、七間都full咗,惟有同陳生一樣明年補擺。梗係啦,原來噚日比起上年9月9號「長長久久」仲多咗11對新人結婚,有新人兩年前就開始準備喇。

拋花球落女主播手上

講到矚目,可能要數噚日尖沙嘴文化中心第一對註冊嘅新人,大家有冇留意呢幾晚嘅無記新聞,唔見咗女主播方健儀(Akina)呢?原來佢都係噚日同男朋友講我願意。平日端莊斯文嘅佢,一身簡約婚紗,坐住架TVBUDDY車牌粉紅花車到場。一對新人心情大好,錫住轉左又轉右,等所有行家都影到靚相,堪稱最合作受訪者。
Akina搖身一變做咗洪太,新郎哥據聞係同台工程師,噚日着住對白色波鞋,同老婆一個有型、一個優雅。去到最刺激嘅拋花球環節,一眾靚女記者一字排開,但有人扮講電話躲避,結果被男同事發現,被迫搶花球,最後紫色馬蹄蘭花球落喺年輕女主播手中,大家估吓係邊位?
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載