蘋果日報 | APPLE DAILY
› 選擇地區
三藩市
紐約
洛杉磯
其他美國地區
2010年10月04日

隔牆有耳:警車變景點 PPRB話跟進 - 李八方

十.一當日,喺尖沙嘴欣賞煙花嘅市民,餘興節目係同交警電單車影相。
互聯網

唔通十.一真係普天同慶?當日喺尖沙嘴,有執勤交警同市民一齊happy,蹺手合照任影唔嬲,一啲市民甚至唔客氣騎埋上部鐵馬度留影。呢輯相日前經網上討論區流出,網民瘋狂轉貼,最終推上報,搞到警方都話會跟進事件。
十.一煙花滙演,大批交警喺尖沙嘴當值。翌日高登討論區出現一輯當晚影嘅相,總共十幾張,高登友以「蝗蟲肆虐」形容呢班圍住交警狂影嘅市民。相中可見好多途人逐個騎上電單車影「到此一遊」相,有啲電單車仲掛住交警件制服外套。

聲稱促進警民了解

有高登友炮轟香港警察冇組織冇紀律,亦有人為佢哋辯護,話外國騎警都係任影唔嬲:「好心你哋唔好咁小學雞。警察唔係辦案嘅時間停低一下同遊客影相有咩問題?」有人憶述自己都曾經騎過交警電單車,自誇「真係幾型」,有人揚言下次見到唔執輸騎埋一份。
警察公共關係科(PPRB)噚日回應,話會跟進市民騎上電單車嘅經過,經初步了解,呢班交警當時負責人群管理,因應國慶「歡樂及輕鬆氣氛」,警方特別要求執勤同事以「寬容及務實的態度」執行任務。警方認為警員應邀合照可以接受,仲可以促進警民了解喎。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載