› 選擇地區
三藩市
紐約
洛杉磯
其他美國地區
香港 台灣 北美
 
2010年09月14日

隔牆有耳:肥彭讚煲呔做得啱 - 李八方

設計圖片

末代港督肥彭日前低調訪港,上星期六下晝同太太喺中環行街,十分悠閒。遠道而來,肥彭當然唔係嚟購物咁簡單,原來當日中午肥彭出席由香港牛津劍橋校友喺中國會舉行嘅午餐會,以"MyWorldsince1997"為題發表演說。雖則肥彭不在其位,不過佢都有講到香港時事,仲讚舊部曾蔭權處理菲律賓人質事件做得啱。
當日午餐會收費每位500蚊,坐滿十幾圍枱,三個月前已預訂爆棚,可見肥彭號召力。
據在場人士稱,肥彭演講雖然不至於風花雪月,但就真係頗為全球化,主要講佢卸任港督後從政嘅事。後來答問環節,有人提及近日城中熱話菲律賓人質事件,問肥彭對特首曾蔭權打電話畀菲律賓總統不獲接聽,寫信又被指冇禮貌事件點睇。

撐致電菲總統冇錯

呢單慘劇係國際大新聞,肥彭似乎都幾留意,快人快語咁話,如果佢做港督時發生同樣緊急事件,佢都會第一時間急call菲律賓總統,要求安全拯救香港人質,仲會打電話返倫敦,搵埋外交部長交涉,事關人命關天,不能掉以輕心,因此佢好同意曾蔭權做法,力撐曾蔭權冇做錯。
肥彭曾任歐盟對外關係專員,係國際級外交高手,據稱肥彭呢次嚟香港,有同煲呔私下敍舊,煲呔得佢稱讚,睇嚟「政治家」呢個稱號當之無愧了。舊時殖民地時代,港英官員似乎好能幹,被指係因為有英國政府一班「教車師傅」在身後教路,否則一班「學神」斷無如此英明神武,今次獲師傅大讚,徒弟終於吐氣揚眉啦。

避重就輕唔提北京

立法會向菲律賓國會提出,旁聽調查慘劇嘅聆訊,肥彭話贊成香港議員咁做,又指菲律賓方面應該配合,因為可以令香港人更清楚事件。雖然肥彭讚煲呔同菲律賓交涉冇錯,不過佢冇觸及令好多人神經敏感嘅「次主權」問題。家陣係牛津大學校監嘅肥彭,訪港前在北京出席首屆牛津中國經濟論壇,評論環球經濟復蘇情況時,佢話會有好多困難,亦有機會見到曙光,果然係非一般外交家。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載