蘋果日報 | APPLE DAILY
› 選擇地區
三藩市
紐約
洛杉磯
其他美國地區
2010年09月10日
馬上成為壹會員

隔牆有耳:應該放入雪櫃嘅停車熄匙 - 李八方

環境局局長邱騰華力推停車熄匙法例,繼7月底同立法會議員實地視察「焗桑拿」後,為免順得哥情失嫂意,上次睇完港九的士有幾翳焗,總不能棄新界的士不顧,噚日分別去咗九龍塘、大埔同沙田再睇一次。邱局長可能已練成心靜自然凉內功,即使噚日又俾司機點到陀陀轉,務必令政府屈服全面豁免職業司機停車唔使熄匙,局長都表現自若。

有的士竟熱到爆玻璃

話說邱局長同五個議員,噚日中午抵達大埔港鐵站的士站時,離遠已經見到幾十個職業司機舉起抗議標語,最矚目嘅一張黑色橫額嚟自全港的士反停車熄匙聯盟,寫住「還要犧牲幾多司機性命?」,在場司機代表一邊嗌口號話停車熄匙係惡法、要求邱局長落台,另一方面又邀請邱局長同議員一齊喺烈日當空下,為菲律賓旅遊巴脅持人質事件嘅遇難港人默哀三分鐘。冇錯,係三分鐘,邱局長同幾位議員都唔介意默哀同實地視察離題,企定定默哀。
未正式上車先熱身三分鐘,邱騰華正式坐上蒸籠咁熱、熄匙停低等客嘅的士兜圈,公民黨余若薇同佢坐埋同一架的士,當時車廂錄得溫度達到攝氏37度。有幾熱呢?八方見到一早上車坐喺前座、等局長上車嘅政府新聞處攝影師熱到成頭大汗,個樣已屆中暑邊緣。
邱騰華已經算執到好籌,其他議員試坐嘅的士,有啲司機位熱到攝氏40幾度!長毛坐嗰架的士仲誇張,兜圈唔夠10分鐘車程,返到的士站時,後面坐位車窗玻璃突然碎裂,熱到爆玻璃!兩次實地視察,熱到身水身汗,邱騰華表現仍然強硬,除咗同意在酷熱同暴雨警告生效時,可全面豁免停車熄匙外,巴士公司提出嘅上客前畀10分鐘豁免開定冷氣,就一步不讓,表明咁做違背立法原意,仲交番個波畀議員,話由議員定奪。

局長想將波交畀議員

不過,余若薇冇熱到儍咗,即時將個波交回局長,指政府有責任提出豁免意見,由議員再商議。官員、議員都唔願接波,可想而知停車熄匙豁免問題真係㷫到辣手,官員同議員都唔想做醜人,既然如此,不如局長將條例放入雪櫃攤凍,當冇事發生過,可能皆大歡喜喎!

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載