› 選擇地區
三藩市
紐約
洛杉磯
其他美國地區
香港 台灣 北美
 
2010年08月31日

消費blog:唔去菲島 可去離島

梁兆棠話,大人細路透過呢套「離島假期」桌上遊戲,可以睇吓想去邊個離島度假。
區民傑攝

康泰旅行團喺菲律賓被槍手脅持,八名團友及領隊無辜枉死。港府發出黑色旅遊警示,唔少香港人話唔會去咁冇安全感嘅地方玩。
咁樣大家放短假期有乜地方可以去?離島區議會噚日喺記者會硬銷《離島節2010》。活動籌委會召集人梁兆棠,建議唔想外遊嘅市民,可以考慮去離島玩三日兩夜喎。

離島節開幕有食又有玩

話明係離島區,東一個島,西一個島,但唔一定要山長水遠都可以體會到。棠哥話,9月12日星期日下晝1點,會喺中環十號公眾碼頭,舉辦《離島節2010》開幕禮。到時以廟會形式舉行,大家喺中環就可以免費試到離島美食,包括長洲太平清醮平安包、南丫島土製茶果、大澳蝦糕炮製嘅蝦豬餅,同埋梅窩地道湯圓等。唔單止地道美食要移船就磡,就連梅窩景點銀礦洞,一樣製作咗個A貨模擬版本搬去中環,等大家好就腳咁入洞探險,另外仲會展出傳統大澳龍舟。
離島區議會仲請專家,照住大富翁條橋,製作一套「IslandsGoGoGo離島假期」桌上遊戲。每間學校送兩套,向學生哥推廣離島景點。市民想得到呢套限量版非賣品,可以喺9月11日星期六下晝兩點,去奧海城出席「離島假期」遊戲推廣日。想嗱嗱聲去離島吃喝玩樂,可以上網 http://www.islandsdc.gov.hk/index.php?action=home 睇真啲。

電郵:mailto:shoppingjing@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載