蘋果日報 | APPLE DAILY
› 選擇地區
三藩市
紐約
洛杉磯
其他美國地區
2010年08月24日

隔牆有耳:何俊仁向黃毓民道歉 - 李八方

何俊仁(左)道歉,但黃毓民條氣仲係唔順,從此割席。資料圖片

政改表決當晚,黃毓民護送何俊仁離開立法會,算有義氣。但上星期《壹週刊》篇專訪引述咗何俊仁一句,話社民連靜咗唔知係咪同毓民個仔被捕有關,嬲到毓民紮紮跳。鐵頭仁噚日發聲明補鑊,承認失言並公開道歉,但毓民條氣仲係唔順,話何俊仁「用心可誅」,從此割席。
何俊仁喺《壹週刊》「非常人語」篇專訪提起社民連民望下跌,佢話:「有支持者問,社民連咩事?點解靜晒?係咪(因為黃毓民)個仔拉咗?」毓民前日辦事處開幕,跟記者行家講到㷫烚烚,話要「重新評價」何俊仁:「要搞就搞我,唔好搞我個仔!」長毛都鬧埋一份,話何俊仁落井下石,要搵佢算賬。

黃毓民三點反駁

何俊仁噚日出聲明耍晒冧,「鄭重及誠懇」向毓民同家人道歉。但毓民唔收貨,出番一頁紙聲明,寫咗三個重點反駁。一、今年初個仔喺內地被捕,佢對五區公投都冇動搖;二、「食得鹹魚抵得渴」,但係「禍不及妻兒」;三、社民連黨校普羅政治學苑如火如荼,書展出書,又訪問美加,何來「靜晒」?佢要求何俊仁向社民連道歉,「以推論代替觀察,以猜想代替認識…用心可誅」。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載