蘋果日報 | APPLE DAILY
› 選擇地區
三藩市
紐約
洛杉磯
其他美國地區
2010年08月18日

八方人物:張國鈞嘆捉到企鵝唔識造勢

被網民惡搞嘲笑,張國鈞說不介意,因為早料到民建聯這塊「招牌」易招風雨。謝榮耀攝

一句「北極人少企鵝多」,民建聯副主席張國鈞去年中迅速「竄紅」,「企鵝男」諢號在網絡世界熱爆。「錯就要認,打就企定。」張國鈞沒有怪網民對他太狠,反而大嘆當時走寶,錯失化身「企鵝男」做個人宣傳的大好機會。如果2012年有機會參選立法會選舉,「企鵝男」翻身有望,「我夠膽死喺宣傳單張畫隻企鵝做logoo架,有乜唔得呢」。
張國鈞,36歲,一直沒有想過從政。求學時與不少同學一樣,受到電視劇《壹號皇庭》「感召」,立志投身法律界,最終如願以償在城市大學法律系畢業,一直「好哋哋」當其熱愛的律師工作,做一個最平凡不過的普通人。

「講錯嘢只可怪自己」

「民建聯」這三隻字,一直容易惹是生非,張國鈞10年前加入民建聯時已知道,「大家對我哋嘅要求係高啲、唔同啲,冇辦法」。因此他並不奇怪,近年每逢揹着民建聯招牌的人犯了錯,自然會成為網民惡搞對象;前有讀錯英文而被嘲「搓胸」的陳克勤,後有誤指北極有企鵝的自己。
「外界將錯誤放大係冇得好講,但講錯嘢一定係自己唔啱,要怪只可以怪自己」。張國鈞坦言在最當「紅」日子,幾乎看遍所有關於自己的惡搞傑作,看時沒有不悅,反而想起:「啲企鵝扽吓扽吓咁落水,好得意吖。」
當日他為港台節目《左右紅藍綠》錄影「出事」節目,原已錄好一個沒有提及「北極有企鵝」的版本,只是忽然想有個「得意」開場,再錄「加料」版,結果一「加」成名。他原先覺得是小事一樁,沒料到瘀事越滾越熱,「後來意識到自己係副主席、身份變咗,所以講錯少少嘢,人哋就會好care」。
「出事」之後,不少朋友向他雪中送炭,「有啲朋友幫我搵過,話企鵝喺北極出現過,不過絕咗種之嘛,你快啲同人講番」。他知道死撐沒有好下場,「人人都難免犯錯,點樣面對先至緊要。如果當時我衰衝動要澄清,後果仲衰。」

「咁都介意點從政呀」

他自爆當時曾與某些黨員研究過,打鐵要趁熱,倒不如將瘀事化做正能量,提高知名度,「有人都覺得唔好嘥咗呢個機會,不如用企鵝為自己宣傳,例如喺網上搞《企鵝飯堂》,訪問名人。呢啲嘢冇話啱定錯,起碼有人記得你係張國鈞先啦,唔係邊個識你張國鈞呀?」
他最記得鵝頸橋區議會補選那一晚,連社民連前主席黃毓民也跟他說:「其實唔使太介意喎,可能係好事嚟o架,有人識你呀!」他認真的想了一遍,還跟黨領導正式提議,大佬們都說「你咪去囉」。遺憾的是,那時他的律師行很忙,最終未有將絕地反擊計劃付諸實行,「家諗起,都覺得錯失時機」。
問他若2012年去馬參選立法會選舉,會否再用企鵝男做生招牌?「係都唔奇喎,我真係夠膽死o架,宣傳單張畫隻企鵝做logo都得。」置諸死地而後生,他強調:「如果人哋一講親件事你就黑面,人哋咪玩你囉;你唔肯去面對,就更加驚、更加唔敢講嘢;咁都介意,點從政呀?」記者許偉賢

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載