› 選擇地區
三藩市
紐約
洛杉磯
其他美國地區
香港 台灣 北美
 
2010年08月09日

隔牆有耳:今次遊行警察好熱情 - 李八方

現職警員噚日罕有唔幫遊行人士拍video,反而退休警員自己擒高拍攝一班舊同袍留念。
林俊謙攝

大班網民不滿包致金姪女Amina案嘅判決,噚日喺立法會門外搞遊行抗議。平日經常被批評濫權嘅差人難得有人撐,噚日先後舉行嘅自由黨同網民遊行,安排上都零舍唔同。自由黨幾十人遊行時,有警察一直喺行人路幫手開路,不論遊行前方有清潔阿叔喺度開工,定擺咗梯裝修嘅工人,都一律被警員預先邀請「借過少少」,好有禮貌咁請佢哋等遊行隊伍經過之後,先至開工。

反常沒沿途派員拍攝

年中唔少遊行上街,部份記者同八方心態一樣,陪住大隊走,其實採訪同參與兩種目的都有。今次事件中被摑嘅係一名交通警員,佢嘅交警同袍噚日亦同多部警車同鐵馬全程陪住,至於啲交警噚日係咪執行職務同無聲支持兩種目的都有,就要佢哋至知。
據知警方今次亦非常彈性處理遊行前需「七日前通知」嘅要求,喺星期六,一日之內就批出不反對通知,仲答應派人做糾察幫手維持秩序。
一向鍾意喺市民遊行期間搵攝錄機全程監察嘅警方,噚日不論自由黨嘅幾十人遊行,定網民發起嘅幾百人遊行都唔見影,反而一班首次參加遊行嘅退休警察,就不斷攞相機、攝錄機為自己獻出嘅第一次留念,仲不時同班現職同僚打招呼。有遊行市民事後即場問警員點解會咁,得番嚟嘅回應係「因為你哋好和平」。
社民連主席陶君行睇到咁多「異象」都話好感嘆,指平日即使只係幾名黨友和平示威,都俾大量警察圍住兼搵部攝錄機到實,唔知警方噚日突然收手唔做影像紀錄,係咪怕影到休班同袍示威,又指平日遊行好少見警方好似幫自由黨咁樣開路。

網民搞手插政黨抽水

自由黨噚日搶食頭啖湯,搞遊行比網民早一個鐘。網民遊行搞手PeterSun遊行後不點名插自由黨,指早前有政黨主動聯絡佢,建議同網民一齊搞遊行,但指明要讓路畀黨掛牌頭、行頭位,最終佢堅持唔想畀政黨抽水後,就出現自由黨提前喺朝早11點行先。Peter直言咁做「好可悲」,指「香港人咁都唔團結,呢個係家班權貴咁惡嘅原因」。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載