蘋果日報 | APPLE DAILY
› 選擇地區
三藩市
紐約
洛杉磯
其他美國地區
2010年07月02日
馬上成為壹會員

不信政府 不信政黨
普選靠自己 老嫩都出來

青年人戴V煞面具遊行,要求廢除功能組別,掃走特權階級。
司徒世華攝

【本報訊】2012年你不會看見普選、功能組別不會被消滅……眼前是一片灰爆的政治困局,但5.2萬名40後、50後、60後、70後、80後、90後還是要在這風和日麗的假期天,流着一身臭汗,從維園操上政府總部抗議。蟻民不信政府,更不信政黨,堅信要踢走功能組別、要有一人一票真普選,只能靠自己上街爭取。
記者:倪清江 林浚川

相關新聞:200警政府總部清場

如果政黨還懂得謙卑,每年7.1都應該在維園認真聽聽民意。政客的骨頭再硬,最終也在政改投票中選擇妥協,40多名帶上V煞面具的年輕示威者,卻堅持廢除功能組別,誓以自己的方法爭取真普選。他們是團體新青年的成員,昨身穿黑衣、高舉一幅「踢走功能組別」的黑色橫額上街。
23歲的阿King說,一身V煞造型是要反對法西斯政權,「選委會小圈子、沒收民主女神像,高官帶頭唔投票,都係極權政府所為」。對於政黨,他們更失望,「民主黨根本係背棄民主,出賣咗自己底線,一人兩票都叫普選?」這幾個月,這批V煞自發落區宣傳、教市民登記做選民,又決定遊行過後留守政府總部,「到咗下次選舉,就會掃走啲出賣民主嘅政客!」

「我哋諗嘢係有pointo架」

讀中三的鍾小姐,與三位90後同學高舉「民主決裂,漁人得利」的紙牌上街。她們反對民主黨方案,但希望泛民團結,繼續合作爭取廢除功能組別,「唔希望泛民群龍無首,下次選舉我會支持公民黨」。90後青年阿智,昨透過facebook動員了數十名中學生一起上街,有人高舉「不要下跪的奴才」紙牌抗議。
阿智說政改陷入困局,年輕人更要站出來,「我哋主張冇政黨,我哋諗嘢係有pointo架,我哋後生仔自己上街,唔係受社民連影響,喺自己諗清諗楚先行出嚟」。年輕人前仆後繼,60後的吳先生也滿腔激情,高舉着「赤裸出賣香港人,劉慧卿眉開眼笑」紙牌,站在民主黨的街站前靜默抗議。支持多年的政黨臨陣轉軚,但吳先生絕不灰心,他堅持每次選舉票照投、每年7.1街照上,「係投咗民主黨好多年,但係唔會失落,始終會有新嘅政治人物取代!」

相關新聞:拆局人數減響警號泛民要團結

人人發聲
張同祖 導演--相信人民力量

「年年都有嚟,家過咗嗰個唔係一個好方案,好似一間屋有四面牆,側邊有條罅,叫人伸到隻腳出去,但係腳下面係咩我哋唔知,民主黨唔能夠說服所有人,到底係咪帶緊群眾走啱路?我哋明明反對功能組別,家反而加咗,用特權去打倒特權,要幾廿年後先溝得淡。要堅定囉,唔前行咪唔前行囉,我唔信人民力量改變唔到佢。」

青台義工鹵味男--捍衞言論自由

「今日天時暑熱,我連衫都唔着都要行出嚟,就係要響應民陣呼籲,捍衞2012雙普選。冇嘢o架,我哋香港人冇嘢硬,淨係得番條腰骨就最硬。所以我哋要出嚟行,捍衞番我哋嘅腰骨。我係青台義工,今日上街同嗌咪,同樣係要捍衞香港人嘅言論自由,堅持2012真普選,提防呢個政治雷曼債券!」

謝氏夫婦 藝術家--遊行因愛香港

「今年遊行係因為普選訴求未解決,政改方案過咗係事實,但係回應唔到我哋,所以整咗啲透明人形公仔出來遊行,諷刺政府當我哋透明。我哋由拍拖結婚到生仔,年年7.1都出來遊行,今日仲陀住第二個遊行。因為我哋愛呢個地方,以香港為家,希望可以喺度安居樂業。我哋今日推住架BB床出來遊行,象徵為下一代推動民主。」

張先生(左) 飲食業--撐阿富有骨氣

「鄭家富係我偶像,欣賞佢有骨氣,喺咁大壓力之下,作出明智抉擇。我自己對政改方案好失望,功能組別咁廢,居然仲可以增加議席。我以前係民主黨擁躉,但係以後唔會再支持佢哋。發現今年遊行人數少咗,可能係大家心中有條刺,明明贏晒形勢,余若薇辯論都大勝七比一,最後竟然都要通過咁嘅爛方案,嗰種失落,好難講得出。」

梁先生 60歲--冇普選罷交稅

「我贊成用循序漸進、較為激烈方法爭取真普選。定一個時間表畀政府,今年你唔畀我普選,我咪唔交稅;後年仍唔畀,我唔交10%。呢種係違反法律,但係公民抗命,成日都講,但唔做,我已喺facebook成立群組,呼籲人加入。功能組別會更難取消,民主黨冇腦筋,武器(區議會方案)落喺北京、民建聯手,會扭曲普選定義。」

蘇先生 患肌萎症--促增撥護理費

「每一個肌肉萎縮症患者,病情只會越嚟越嚴重,遲早要喺喉嚨開窿做手術。做完手術後,每個月要畀過萬蚊護理費,一般家庭唔可能負擔,惟有全家一齊放棄工作,申領綜援;否則只能留喺醫院。我坐住輪椅都要上街,因為我哋發起『我要回家運動』,爭取政府增撥資源畀我哋,唔使申領綜援都可以返屋企接受治理,一家團聚。」

老睿智 16歲--「我冇收200蚊」

「我冇收200蚊o架!我哋喺facebook開咗個叫90後動員嘅組織,由5.30平反六四大遊行、6.23包圍立法會,到7.1都不斷動員年輕人為公義、為民主發聲。我哋好希望更多年輕人主動行出嚟,講出自己嘅聲音,因為個社會遲早係屬於我哋,主動出嚟爭取,唔使畀啲大人以為我哋唔關心社會,只喺識得匿埋喺屋企打機。」

周先生 32歲--送港府英國旗

「我攞番以前統治我哋嘅英國旗出嚟,係要令我哋嘅特區政府覺得可恥。呢個政府應該覺得好慚愧呀,回歸13年啦,個政府乜都做唔到,社會情況差,人工冇好過,政改又乜都做唔到,回歸前新九組仲民主過家!如果人民滿意,我哋點解要行出嚟?我自從03年7.1後,今年首次再上街,我對呢個政府不滿嘅程度,去返03年嗰時!」

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載