蘋果日報 | APPLE DAILY
› 選擇地區
三藩市
紐約
洛杉磯
其他美國地區
2010年06月18日
馬上成為壹會員

隔牆有耳:中大校友 吹雞護校 - 李八方

設計圖片

呢期中大校友圈子好熱鬧,連好耐冇聯絡開嘅,都突然透過facebook、電郵聯繫起來。大家咁緊張,係因為下個星期六(6月26日)將會舉行校友評議會會員大會,屆時選出三個新委員,仲會動議討論永久擺放新民主女神像,並要求校方撤回政治中立言論嘅議案。改革派同建制派兩方人馬都磨拳擦掌,有中大校友喺網上吹雞,以南非魔鬼喇叭Vuvuzela咁高分貝,呼籲中大人踴躍出席或者授權校友投票,一個都不能少,寸土必爭。

六人競逐三個委員空缺

中大校友兼校董陸耀文解釋,校友評議會係按大學條例成立嘅法定官方諮詢架構,每年都會舉行會員大會。今年罕見有六個候選人競逐三個委員空缺,競爭異常激烈。佢又指近期中大好多爭議,除咗「民女」事件,仲有改制下文學院統一收生,令向來有書院特色嘅藝術系、音樂系等,面臨被打散到各書院嘅問題,呢啲都會喺評議會上動議辯論。
有校友透過facebook吹雞,呼籲「中大友出來」,認為多年來呢個校友評議會都被親建制派壟斷,淪為校方管理層啦啦隊,主要功能變成同「有地位」嘅校友聯繫籌款,起唔到監察校政嘅作用,亦擁抱所謂「政治中立」。

動員校友上網登記出席

今年嘅會員大會咁受注目,係因為有三個被視為改革派嘅年輕中大人出來參選,希望加強評議會嘅監察功能,令校政更透明化。三個候選人分別係徐淑梅(崇基2002心理學系)、李耀基(聯合2009政政系)同黃俊邦(逸夫2006政政系)。李耀基有學生會同學聯背景,黃俊邦有傳媒經驗,現為香港獨立媒體網嘅編採職員。
至於另外三個候選人有中學校長、國民教育基金委員同中大職員,被一啲校友視為親建制派。有中大友分析,三位年輕校友要勝出,需要600票至700票,因此正動員校友上網登記出席會員大會,無法出席嘅,登記完再上網填授權書,可以委託出席校友投票。有校友話,過往呢個會員大會通常只有幾十人參加,今年隨時破紀錄。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載