› 選擇地區
三藩市
紐約
洛杉磯
其他美國地區
香港 台灣 北美
 
2010年06月17日

隔牆有耳:煲呔起完錨即潛水 - 李八方

設計圖片

倒數仲有24個月退休嘅特首曾蔭權,原來已經盤算起錨撤出禮賓府安排。佢接受now100台節目《HomeSweetHome》訪問時透露,已開始同太太商量如何大屋搬細屋。佢話結婚後搬屋十幾次,次次都好擔心、好大件事,有時躁躁哋,仲會同太太頂頸。

05年提退休後變特首

搬入禮賓府初時,煲呔曾經講過退休後會離開香港,潛水一段日子,以免影響繼任人工作,咁兩年後起錨會去邊呢?佢話暫時未諗清楚,只係決心「的」起心肝學古希臘文同希伯來文,因為《新約聖經》係用古希臘文寫,大部份《舊約聖經》係希伯來文,身為天主教徒,佢希望可以學曉呢兩種文字,之不過呢兩種文字都十分艱深,佢笑言見到上帝時,應該都未學曉,現在日日工作12小時,希望退休後可以全神貫注學習咁話。
八方記憶之中,煲呔上次談退休在05年初,當時聲言退休後告老歸田,點之冇耐老董就腳痛落台,輪到佢吹住口哨上位;今次喺政改關鍵時刻再講退休,有乜玄機,大家不妨諗諗。
煲呔嗌起錨卻冇目的地,接受訪問時亦冇透露退休後去向。遷出禮賓府,自然要搬入尋常百姓家,相信煲呔唔會住佢口中幾千蚊呎嗰啲新界樓啩。八方聽聞佢曾經同人講,退休後搵地方住都幾苦惱,祖屋碧雲樓一來已出租,地方亦唔夠大;幫襯發展商買新樓,又怕俾人指官商勾結有着數,加上近年樓價有升冇跌,因此佢退休後分分鐘變成無殼蝸牛,與其為間屋煩,不如潛吓水周遊列國一年半載更好。

細時百厭毀政府財物

不過煲呔潛水應該唔會好耐,事關佢實掛住個孫女,只要孫女打電話叫佢一聲爺爺,已經由心甜到落腳趾尾,又笑稱成日俾孫女「蝦」,身為特首,對住孫女都冇得話事。訪問中煲呔又話當年,細個住警察宿舍時好百厭,試過拆爛警車個咪錶,東窗事發連累父親被扣人工,佢就飽嚐藤條炆豬肉,事隔多年對體罰猶有餘悸,到佢自己教仔,梗係唔捨得打仔啦。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載