› 選擇地區
三藩市
紐約
洛杉磯
其他美國地區
香港 台灣 北美
 
2010年06月17日

消費blog:可扭細膠樽 減破壞環境

紀偉如(右)話輕量樽用少啲膠,不但容易扭細,仲可以減少「碳足跡」。
黃耀興攝

問答題,好佬怕爛佬,shopping精最怕咩人?咪環保仔囉。消費玩樂後,都怕被環保組織狙擊,同海豚影張相都驚俾人鬧虐畜。呢一次寫嘅消費資訊對環保都叫做有小小貢獻,因為Bonaqua喺7月會推出「輕量樽」,係全港首支可以扭細嘅樽裝水。
膠樽用完最好回收,但啲樽好硬淨,放喺回收箱好快逼爆,但輕量樽用咗新嘅吹樽技術,用少啲膠。

製造膠量少34%

以500毫升裝為例,用膠量少34%,重量只有11.8克,係全港最輕。樽身較舊款薄咗大約0.05毫米,樽底都薄啲,所以容易扭動、不易反彈,可以好似扭毛巾咁扭細,體積平均細86%。
小妹搵咗Bonaqua所屬嘅可口可樂公司了解,香港及澳門區非碳酸飲料市務總監紀偉如話,輕量樽水價錢不變,而且瓶身結構強度同傳統一樣,用起上嚟感覺差唔多。
創新及商業化事務技術總監歐陽榮解釋,膠樽用料PET中62.5%係碳,碳經棄用同降解後,會釋出二氧化碳,即係「碳足跡」。輕量樽以500毫升裝為例,「碳足跡」大約少34%,減少破壞環境。紀小姐話,個樽好易扭,但我試扭過,覺得都要用啲力水,一般女仔要扭兩、三次先得。
紀偉如補充,輕量樽在日本、台灣和中國已經上市,但暫時其他飲品包裝唔會用輕量樽。

電郵:mailto:shoppingjing@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載