› 選擇地區
三藩市
紐約
洛杉磯
其他美國地區
香港 台灣 北美
 
2010年05月20日

隔牆有耳:網誌吐心聲 陳巧文預告自閉 - 李八方

設計圖片

成名太累?前年一舉雪山獅子旗而成名嘅港大女生陳巧文,瞬即成為社運新女神,過去年幾十分活躍於社運界,幾乎次次遊行集會、示威抗爭都現身,近日卻好似少咗曝光,公投拉票都唔多見佢露面。日前佢喺自己個blog自述近況兼吐露心聲,表示「我公眾人物的身份已令我自己及我身邊的人感到筋疲力盡」,顯得意興闌珊。

怕被偷拍在家也戴墨鏡

近日有雜誌又偷影陳巧文,其實佢只係打網球,冇乜特別,可能怕再成為狗仔隊目標,佢前日在blog形容自己「兩年內提心吊膽地生活,已令我近乎崩潰。」甚至連累家人「在公眾地方吃飯也不敢,我在自己的家也不時會在晚上也戴着太陽眼鏡!」
驚到喺屋企都要戴黑超,難怪佢話「我們已無法再承受這些說不出的壓力,也不能再如此paranoid地生活下去……。」當日忽然拉起雪山獅子旗,隨即成為傳媒焦點,外界又揣測陳巧文有意從政,佢自己終於表白,「其實兩年前我只是在自己facebook柴娃娃地發起一個我本以為是平常不過的示威,從未預期會因此被追訪,因而過着終日逃避狗仔隊的生活。」

「心很亂很多事情未想通」

柴娃娃開始的示威,結果可能在法庭見,陳巧文被指在元旦遊行時涉嫌襲警,佢話「決定靜下來一會兒」,也許會俾人鬧佢無堅持、經不起考驗,但希望大家諒解,又強調一直無做過甚麼對不起任何人的事,「可說問心無愧。」
對於再有雜誌偷拍佢,佢希望大家唔好買任何八卦雜誌,做朋友嘅想了解事情,上網或是去便利店睇就算,唔好花錢買。八方噚日曾致電陳巧文,不過佢冇聽電話,佢網上留言稱「我的心很亂,許多事情也未想通,亦根本找不到能量去找任何人,所以其實我一直差不多每天都躲在家中,電話也幾乎全沒接,希望大家原諒。再會!」
陳巧文「戰友」、FM101成員梁穎禮話相信陳巧文並非退出社運,近日亦有聯絡,唔發覺陳巧文情緒有異樣,「唔會有乜嘢情緒大起伏,冇嘢喎。」

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載