› 選擇地區
三藩市
紐約
洛杉磯
其他美國地區
香港 台灣 北美
 
2010年02月10日

隔牆有耳:曾鈺成拆解五區公投 - 李八方

民建聯維園年宵檔噚日開張,一班身穿印有民建聯黨徽同「禮義廉」三隻大字T恤嘅人去捧場,八方相信佢哋都係想睇吓剪綵嘉賓財爺鬍鬚曾風采,同埋為民建聯贈興,點知唔行近猶自可,一行埋啲幾乎好似去到中聯辦咁,事關民建聯攤位外竟然放晒鐵馬,仲有多個維園保安、警察戒備,民建聯聲言開門建黨,擺年宵卻拒人千里。

唔想托市民手踭

鬍鬚曾駕臨,有年宵檔主希望佢照顧吓小市民,大嗌「財爺放水」,點知話口未完,八方就見到多個戴住耳機嘅便衣警員現身,驚死有人對鬍鬚曾不利咁怒睥嗌「放水」者,嚇到大家即時收聲。做完賀年騷後,警員組成人鏈護送鬍鬚曾離場,民建聯創黨主席兼立法會主席曾鈺成亦急急腳走人,話趕去西環幫街坊寫揮春。有記者問佢日前係咪幫街坊寫咗張「五區公投」揮春,佢表情意外地反問:「你哋點解會知o架?」
事緣有人喺網上post咗張「五區公投」揮春,聲稱係曾主席墨寶;民建聯反對公投,常理唔會寫撐公投揮春,點知曾鈺成直認張揮春出自佢手,至於點解肯寫,佢詳細解釋。「五係五福臨門,區係區泰民安,公係公平合理,投係投資有道,哈哈哈哈。」
北京、建制派、高官聞五區公投色變,曾主席權威解釋五區公投,證明合情合理合法合憲,其他人不應說三道四,既然曾主席都撐五區公投,煲呔唔使顧忌,一於去投票啦。
八方知道好多人最想民建聯寫「禮義廉」揮春,阿曾話街坊開口,佢唔會托手踭,「唔緊要啦,過年過節,大家都係想開心啫,市民都係想開心啫。」不過民建聯主席譚耀宗卻無咁易話為,表明「我唔寫揮春嘅!」遑論寫「禮義廉」揮春,直指有人「教壞後生仔」,「成日講埋呢啲嘢係無意思嘅,成日喺度侮辱人係無意思嘅,我哋係有教育水平嘅人嚟嘅!」呢樣好多人都知,民建聯孝悌忠信禮義廉吖嘛!
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載