蘋果日報 | APPLE DAILY
› 選擇地區
三藩市
紐約
洛杉磯
其他美國地區
2010年01月14日

隔牆有耳:鼠王芬自認垃圾唔投票 - 李八方

設計圖片

民主黨李華明噚日提要求釋放劉曉波動議,每逢呢啲大是大非嘅事,就係照妖鏡顯靈嘅時候,乜嘢鼠輩、狗屎、垃圾通通現形。
「專業會議」鼠王芬自詡內地護法愛徒,法律知識超越常人,早前傳媒請佢評論劉曉波判刑,佢發表權威意見,指或因外國領事介入,令人覺得劉曉波背後有外國勢力,所以反而重判。鼠王芬呢個專業分析令人O嘴,噚日佢喺立法會發言,卻指內地裁決粗疏,判刑好重,鼠王芬似乎同情異見人士,其實佢以議會唔適合就此問題表決為由,表明唔會投票。
鼠王芬得把口,社民連陳偉業聽完之後頂住道氣,發言時不點名批評有啲人教「狗屎垃圾法律」,暗諷有人說話狗屁不通。呢個世界好多人講就口響,做就走樣,面對良心議案,揞住良心嘅人梗係寧願捐窿做逃兵都唔投票啦。
陳偉業一輪炮轟,鼠王芬竟然對號入座,指陳偉業言論有冒犯性,要求佢收回,更大發雷霆要求主席曾鈺成裁決,還她一個公道。見慣大場面嘅曾主席同意聽錄音再裁決,由於陳偉業發言時冇點名,又話唔係針對鼠王芬,所以曾主席認為呢番言論有侮辱性但都冇符。

發難趁機離開議事堂

鼠王芬硬食「狗屎法律」極度不滿,唔等到投票一刻就起身離場以示抗議,份屬「專業會議」嘅何鍾泰幫拖,指立法會只得一個議員教法律,陳偉業針對邊個好明顯,就連恥笑鼠王芬買廟街貨嘅石禮謙同法律超人謝偉俊,都聲言睇唔過眼曾主席咁唔公道,一齊離場。
結果,石禮謙、謝偉俊同鼠王芬都冇就釋放劉曉波議案投票,佢哋既冇投贊成票,亦冇留下投反對票紀錄,反觀都有離席抗議嘅何鍾泰均真好多,轉頭就入返去㩒掣投反對票,佢做得人大代表,呢一票又點走得甩呢?
事後鼠王芬聯同何鍾泰、劉秀成、石禮謙、黃宜弘、謝偉俊去信曾主席,表示不滿其裁決,更聲言可能有更多議員聯署,曾主席分分鐘俾鼠輩煩到暈。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載