› 選擇地區
三藩市
紐約
洛杉磯
其他美國地區
香港 台灣 北美
 
2009年12月18日

隔牆有耳:康泰老闆放心交棒 - 李八方

康泰太子爺黃進達(左)逐步接班,黃士心有望交棒。資料圖片

康泰旅行社老闆黃士心半退休,大把時間刨馬經,偶然技癢,明年農曆年親自帶團東加勒比海11天豪華郵輪之旅,坐全球最新最大嘅海洋綠洲號(OasisofTheSeas),雖然團費包稅最少四萬幾蚊,不過一早爆滿,原本收40幾個客,結果收咗123個客,好多人自願加多兩萬蚊升呢住靚房。

團友加錢升呢

至於黃士心,則住全船僅25個嘅皇家複式套房,另外兩組客人唔執輸,畀多一倍團費都要升呢,以八萬蚊價錢,享受住海上複式套房嘅滋味。
黃士心有閒情遊山玩水,因為兒子黃進達Jason幫到手,呢位太子爺最近以651票歷來最高票數當選旅遊業議會理事,好多人以為佢係因父之名,黃士心卻話個仔先斬後奏,「佢決定參選先同我講。」Jason參選好認真,好似選議員咁,竟然逐間旅行社「洗樓」拉票。咁落力,太子爺似乎志不在旅遊業議會個位喎,角逐旅遊界議員都得啦。不過黃士心話Jason要全力發展新加坡業務,康泰在當地每年營業額過千萬港元,「當地人越嚟越鍾意外遊,好有潛力。」

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載