› 選擇地區
三藩市
紐約
洛杉磯
其他美國地區
香港 台灣 北美
 
2009年09月27日

妻誕女中風昏迷 夫網誌盡訴愛意
病危媽媽牽動萬千網友心

黎太誕女後與先生及囡囡幸福合照,後因腦中風陷入昏迷。 互聯網

【本報訊】丈夫在病床前播放BB的生活短片,阿蚊終於醒了,床邊的醫護人員都笑了。可是過了不久,阿蚊又斷斷續續昏昏醒醒。28歲產婦袁嘉雯(其夫暱稱:阿蚊)上月誕下嬰兒後,懷疑腦中風發作,初時頭痛、神志不清,後來陷入昏迷,至今已做了四次手術,病情並未好轉。兩口子用盡一切方法溝通,阿蚊試過吞口水、轉動眼睛示意,丈夫則舉起三隻手指代表「我、愛、你」。丈夫黎先生在網誌記下每天探望太太阿蚊的經過,一點一滴,都是淚水。 記者:蔡元貴、麥志榮

相關新聞:醫生之言妊娠性血壓高可致腦中風

黎先生說:「我想寫畀阿蚊同BB諾霖。願每一位讀完我同阿蚊近期所發生的事,請馬上為阿蚊祈禱。」網誌《陪著你走》從8月23日晚開始說起:「阿蚊突然穿羊水,我立即收拾好『走佬袋』馬上到醫院。」翌日清晨,「阿蚊」袁嘉雯在東區醫院誕下女嬰,取名諾霖。

手術後「阿蚊講嘢反常」

「喺阿蚊床邊,我同佢講霖霖個名點解,阿蚊係雯,BB係林,加埋就是霖,黎諾霖就是爸爸承諾媽媽同女女。」爸爸的承諾不知何時可以實踐。8月26日,產後一直頭痛的阿蚊打電話給身在公司的丈夫:「佢同我講如果我有乜嘢事,你要照顧BB呀!我話你儍啦,冇事嘅,你仲要照顧BB。」
8月27日,掃描結果顯示,阿蚊腦部蛛網膜下腔出血,即日要做手術止血。超過4小時手術後,黎先生進入深切治療部探望太太:「我哋都好驚訝阿蚊可以咁快醒,而且精神幾好,但我察覺有啲唔妥,佢有少少唔同,我都會知,當同佢傾多一陣我便眼淚直流,阿蚊講嘢反常……」翌日黎先生在醫院看過BB後再看阿蚊:「阿蚊同我講好多嘢,但我問BB等你返去照顧,你要快啲好番。阿蚊就同我講:『嗯!咁快啲去鄰居度接BB啦!』我再也忍不住,我手握佢手,回頭便哭,阿蚊仲問我你係唔係凍,我忍住淚水答佢唔係。」
9月2日,阿蚊已陷入昏迷:「護士長用好鼓勵的語氣同我講,你試試同佢講多啲BB嘅嘢,佢可能可以快啲醒,我問我可唔可以播BB喊聲套Movie,護士長答應,當我播BBMovie,我同阿蚊講,霖霖好曳,一冲凉就大聲喊。當時我將BB喊聲放到最大,奇蹟出現,阿蚊立即醒了,在場所有醫護人員都笑了。」
可是阿蚊此後病情反覆,昏昏醒醒。妻子不能說話寫字,黎先生設法溝通。電影《情癲大聖》有一幕,傷重中的唐三藏舉起三隻手指代表「我、愛、你」,黎先生也在病床前向妻子舉起三隻手指:「我希望阿蚊會記起我舉起三隻手指的意思,這是我倆唯一能傳達的心意。」

病床前三隻手指傳心意

9月15日,阿蚊病情一度有點起色:「今天可以用破冰來形容,我發現阿蚊可以吞口水,我試試叫阿蚊可唔可以用吞口水方式回應我,阿蚊郁一郁個嘴來回應我的問題,終可以同阿蚊接上了!我問阿蚊你記唔記得三隻手指代表甚麼,佢郁一郁個嘴,喜悅即時湧上心頭。」
康復的希望很快又再受挫,9月23日,醫生指阿蚊腦部受創的程度比預期嚴重:「由於腦部受創嚴重,亦影響身體機能,平時我哋個腦會防止我哋啲肌肉唔好郁,但阿蚊失去這個機能,所以佢身體好多肌肉會自動收縮,尤其受到刺激時如接觸等,會造成以為阿蚊自己郁動,之前我以為阿蚊對我有反應,其實係因為佢啲肌肉受到我觸摸刺激的反應而已。」
9月24日,護士表示稍後安排阿蚊入療養院,黎先生很難受:「要我放低佢一個喺療養院,我心真的很痛,事實上我知現實我冇可能長時間照顧阿蚊,但我真係唔想阿蚊長時間同BB分開。」
《陪著你走》最新近的一篇網誌是前日(周五)的事,阿蚊做了第四次手術。手術後:「阿蚊醒番,我喺佢耳邊鼓勵佢,我開始發現唔正常,阿蚊雙眼通紅,我回頭一看儀器,佢心跳由100一直升到200!身體不停震,我不停咁叫佢冷靜,當我望住佢時,我心知不妙,阿蚊雙眼瞳孔放到最大,我眼淚不停湧出……」醫生需要向阿蚊注射鎮靜劑,讓她入睡。

網誌點擊率超2.8萬次

網誌的點擊率已超過2.8萬次,每天都有大量網友留言安慰黎先生。其他網站也開始轉載,大夥兒祈求命運別再播弄阿蚊一家,黎生的痛苦只有他自己才能感受得到:「一些普通的事已變得奢侈,歡笑是必然是應份的嗎?那怕我將一切都給阿蚊,以往的快樂已遙不可及。」

黎太誕女昏迷事件簿

23/08
事發經過:黎太袁嘉雯(其夫暱稱:阿蚊)穿羊水,入院待產

24/08
事發經過:孩子出世,取名諾霖,是名女嬰

27/08
事發經過:阿蚊產後頭痛,接受腦掃描後發現腦部蛛網膜下腔出血,即日做手術止血,手術後阿蚊說話反常

28/08
事發經過:女兒諾霖先出院

29/08
事發經過:阿蚊腦血管嚴重萎縮,導致左半身不能活動,接受通波仔手術,手術後阿蚊不停哭

02/09
事發經過:阿蚊一度陷入昏迷,丈夫黎先生在床邊播放女兒的生活短片,阿蚊立即蘇醒

03/09
事發經過:阿蚊持續高燒,但病情暫時穩定下來

06/09
事發經過:細菌感染導致阿蚊再次發燒

12/09
事發經過:醫生表示阿蚊腦積水導致腦血壓上升,須進行第三次手術

13/09
事發經過:阿蚊依然木無表情,但眼球可以有限度移動

15/09
事發經過:阿蚊可以吞口水,夫妻二人遂以此溝通

17/09
事發經過:阿蚊再發燒,而且對丈夫全無反應,懷疑是血管血塊影響肺部及心臟功能

21/09
事發經過:護士表示阿蚊病情已穩定,很快可以轉往療養院,但阿蚊心跳依然很快

25/09
事發經過:阿蚊要做第四次手術,阿蚊醒來時,心跳由每分鐘100升至200,瞳孔放大,此後不斷抽筋,須注射鎮靜劑

資料來源:《陪著你走》網誌 http://hk.myblog.yahoo.com/carmen-anthony

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載