› 選擇地區
三藩市
紐約
洛杉磯
其他美國地區
香港 台灣 北美
 
2009年09月18日

隔牆有耳:吳敦義搵阿陳算命 - 李八方

台灣新任行政院長吳敦義履新前秘密到港,俾綠營踢爆佢同疑似中共地下黨員梁振英密會聲稱傾防止山泥傾瀉,質疑佢向北京交心。有人再向《蘋果》報料,指吳敦義在港期間仲有同全國政協郭炎在鏞記食燒鵝,同親共人物咁親近,吳敦義今勻被「抹紅」真係跳落日月潭都水洗唔清,佢噚日繼續解畫,透露郭炎介紹佢認識一個風水師,為兒子批流年。

為兒子問前程

台灣消息稱,吳敦義見嘅風水師姓陳,八方知道後嚇一跳,莫非哨牙通重出江湖,做埋台灣「國師」?後來再三打聽,據講陳姓風水師應該另有其人,可能係蘇民峰大弟子陳子才,富豪御用風水師陳朗兒子陳嘉龍,或者鐵板神算陳康泰。
八方噚日聯絡唔到陳嘉龍,陳子才則同八方講近日冇見過吳敦義,陳康泰就話不方便透露客人私隱,不證實亦不否認有冇同吳敦義接觸。升官前長途跋涉搵人算命,難道吳敦義要靠風水治台?不過佢強調自己已經61歲,早知天命,只係個仔想卜算前程。
吳敦義香港行風波持續,遭到圍攻佢話好心酸,民進黨批評佢唧牙膏式交代,誠信可疑,愧對台灣;國民黨就思疑係「藍皮綠骨」內鬼爆料。另一男主角梁振英卻甚風騷,噚晚現身一個酒會見到江素惠,講笑話快啲嚟見佢,因為見完佢就會升官!
台灣藍綠傾軋,香港雖然隔岸觀火,煲呔唔應該蹺埋雙手,最好食住個勢,唔係插手對岸政治,佢冇咁叻,而係加大力度發展香港嘅風水命理玄學產業,將香港建構成大中華堪輿術數平台,利用香港風水命理學家馳名兩岸四地優勢,打造出一個「風水港」。

搞大風水行業

連台灣高官都遠道而來問前程,身為天主教徒嘅煲呔都信呢套,主觀客觀條件俱備,冇理由唔把握時機將風水顧問專業服務發揚光大。風水師收入不菲,掘個窿閒閒哋都有幾億元落袋,真係想窮都難,四大支柱、六大產業呢啲嘢,真係算罷啦。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載