蘋果日報 | APPLE DAILY
› 選擇地區
三藩市
紐約
洛杉磯
其他美國地區
2009年09月13日

隔牆有耳:「隔代一哥」盧偉聰又高升 - 李八方

警隊高層今個月有連串人事調動,呢一輪音樂椅遊戲焦點係總警司盧偉聰於今個月21號接替退休嘅助理處長劉志強,統領保安部,盧Sir被視為「隔代一哥」大熱,晉升至警隊最高階管理層,象徵又近「一哥」個位一步。
警隊高層大執位序幕剛剛開始,副處長(行動)任達榮出年3月退休,應由副處長(管理)曾偉雄接任,曾Sir下一站應該係處長,高級助理處長李家超預料會填補曾Sir空缺。據八方了解,由於多名高級助理處長都屆退休年齡,杜偉義今個月13號退休,古樹鴻、鄧厚昇分別喺明年7月同9月榮休,因此多個助理處長可望升官,鄧甘滿最快跑出接替杜偉義,孫貴良則做東九龍總區指揮官,接替退休嘅何國佳,杜振偉、鄧厚江、馬維騄同卓振賢則排隊升職。

李明逵「頭馬」

另一助理處長劉志強下月中退休,料由總警司盧偉聰接任,佢前年做保安部時係劉志強副手,今次坐正,工作應該駕輕就熟;外界形容佢係前一哥李明逵「頭馬」,最威水係做過國際刑警亞洲及南太平洋區助理處長。盧偉聰本來係西九龍總區副指揮官,升職後由毒品調查科總警司艾樂善接上。另外一名已榮升助理處長嘅係黃志雄,佢目前掌管行動部。而周國良亦已接替鄧甘滿升做助理處長(人事部)。
其餘幾位有機會升職的總警司包括中區警區指揮官趙慧賢、油尖警區指揮官劉業成、元朗警區指揮官李建輝同警察機動部隊校長羅夢熊。警隊消息話,由於盧偉聰最快6年後先到頂,恐防有人中途墮馬,或者好似陳德霖咁「另有高就」,所以警隊最高層做定兩手準備,同時栽培多名警官做接班人,上述幾位有望再上層樓嘅總警司都可以話係準「隔代一哥」人選,知情人士話當中又以李建輝同劉業成最有「黑馬」相。

劉志強有後路

講番退休嘅劉志強,佢今年55歲,按警隊規定係要退休,不過就此退出江湖似乎太後生,據說佢已有後路,或會加入機場保安公司擔任高級經理,追隨前警官、機場保安公司總經理周富祥。
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載